Sahan media Muqdisho: Kenya iyo Soomaaliya ayaa shalay oo Isniin ahayd kala saxiixday heshiis ku saabsan iskaashiga dhinacyada siyaasadda, waxbarashada iyo difaaca.
Ra’iisul Wasaaraha Xukuumadda Federaalka Soomaaliya Xamze Cabdi Barre iyo Mudane Musalia Mudavadi, ahna Xoghayaha Golaha Wasiirada ee Arrimaha Dibadda iyo Qurbajoogta, ayaa isagoo ku sugan Magaalada Nairobi ee Caasimadda dalka Kenya, wuxuu sheegay in ay saxiixeen saddex qodob oo labada dhinac ay uga golleeyihiin sidii loo sii xoojin lahaa iskaashiga labada dal, si ay uga faa’iideystaan shacabka labada dal.
“Heshiiska waxa uu ahaa mid suurta gal ah sababtoo ah sida ay ugu heellan yihiin mas’uuliyiintayada farsamadu in ay si nabad ah wax uga qabtaan arrimaha,” ayuu yiri Mudavadi intii lagu guda jiray kal-fadhigii saddexaad ee guddiga iskaashiga ee Kenya iyo Soomaaliya (JCC).
Mudavadi ayaa intaas ku daray in Kenya ay Soomaaliya la leedahay xiriir gaar ah, ma ahan oo kaliya in ay wadaagaan xuduud balse sidoo kale ay sabab u tahay iskaashi xooggan oo waara.
Axmed Macalin Fiqi Wasiirka Arrimaha Dibadda iyo Iskaashiga Caalamiga ee Soomaaliya ayaa sheegay in labada dal ay sidoo kale dadaal u galeen sidii kor loogu qaadi lahaa iskaashiga dhinacyada amniga, tayeynta dhanka caafimaadka iyadoo sare loo qaadayo aqoonta xirfadlayaasha caafimaadka iyo sidoo kale tababarka saraakiisha booliska.
Wuxuu xusay in xiriirka labada dal uu ku saleysan yahay niyad wanaag iyo go’aanka labada dowladood iyo shacabka ee ah in laga wada shaqeeyo kor u qaadista iyo ballaarinta baaxadda iyo ballaarinta xiriirka.
