Sahan media Muqdisho: Wararka ka imaanaya dalka Spain ayaa sheegaya in meydka duuliye ruush ah oo u goostay dhanka Ukraine sanadkii hore laga helay magaalada ku taal koonfurta Spain sida ay sheegeen warbaahinta Spain iyo Ukraine.
Wakaaladda wararka ee Spain ee EFE, ayaa warbixin ay soo saartay Isniintii, ku sheegtay in Maksim Kuzminov maydkiisa laga helay garaash dhulka hoostiisa ah 13-kii February ee magaalada Villajoyosa, oo ku taal meel u dhow Alicante ee koonfurta Spain.
zminov, ayaa bishii August ee la soo dhaafay ku degay dalka Ukraine isaga oo wata diyaaradiisa Mi-8, wuxuuna ku noolaa Spain isagoo wata baasaboor Ukraine ah iyo magac kale.
Afhayeen u hadlay sirdoonka millatariga Ukraine ee GUR ayaa xaqiijiyay in Kuzminov uu ku dhintay Spain, laakiin ma sheegin sababta dhimashada. Wargeyska Ukrainska Pravda ee Ukraine ayaa sidoo kale sheegay in la helay isagoo meyd ah.
“Waan xaqiijin karnaa xaqiiqda dhimashadiisa,” af hayeenka agaasinka sirdoonka ee Andriy Yusov ayaa ku sheegay faallo uu siiyay Interfax-Ukraine.
Booliska Spain ayaa dhanka kale xaqiijiyay in meydka qof la toogtay laga helay magaalada, balse ma aysan shaacinin qofka la dilay. Ilo ka tirsan ciidamada booliiska madaniga ah ee Guardia ee Spain ayaa u sheegay wakaalada wararka ee Reuters in dhibbanaha laga yaabo inuu ku hoos noolaa aqoonsi been abuur ah.
Wargeyska La Informacion ee dalka Spain oo markii ugu horeysay qoray toogashada ayaa sheegay in baarayaashu ay baadigoob ugu jireen labo tuhmane oo ku baxsaday gaari oo markii dambe laga helay magaalada isagoo gubatay.
Goosashada Kuzminov ee Ukraine ayaa loo soo bandhigay sanadkii hore inay tahay afgambi weyn oo Kyiv ah. Duuliyaha ayaa sheegay in GUR uu ku duufsaday inuu goosto.
Waxaan la xiriiray wakiilo ka socda adeegga sirdoonka Ukraine, waxaan u sharaxay xaaladayda. Waxaa la ii soo bandhigay dammaanad amni, dukumeenti cusub, magdhow lacageed, gunno. Waxaan ka wada hadalnay faahfaahinta waxaana bilownay qorsheynta duulimaadkeyga,” Kuzminov ayaa yiri, sida lagu sheegay warbixin ay soo saartay Interfax Ukraine.
EFE, oo soo xiganeysa ilo GUR, ayaa sheegay in Kuzminov uu go’aansaday inuu ku noolaado Spain halkii uu joogi lahaa Ukraine.
