Sahan media Muqdisho: Kooxda Falastiiniyiinta ee Xamaas ayaa sheegtay Axaddii in wareeggii laba maalmood ee wadahadalka Masar ka socday si loo gaaro xabbad-joojin Qaza ah iyo isdhaafsiga la haystayaasha.
Bayaan ay soo saartay Xamaas ayay ku sheegtay in wafdigooda ay caawa ka dhoofi doonaan caasimadda Masar ee Qaahira si ay wadatashi ula sameeyaan hoggaanka kooxda.
“Wafdigu waxay u gudbiyeen jawaabta Xamaas dhexdhexaadiyeyaasha Masar iyo Qatar,” ayay raacisay, iyada oo aan faahfaahin laga bixin nuxurka jawaabta kooxda.
“Xamas waxaa ka go’an in ay gaarto heshiis buuxinaya shuruudaha qaran ee dadkeena,” ayaa lagu yiri bayaanka.
Kanaalka Al-Qahera ee ay maamusho dowladda Masar, oo soo xiganeysa ilo la hubo, ayaa sheegay in Xamaas ay ku laaban doonto Qaahira Talaadada “jawaabta ugu dambeysa” ee soo jeedinta Masar ee heshiis xabbad-joojin ah oo laga gaaro Gaza.
Sida laga soo xigtay ilo xog ogaal ah, dhammaan tafaasiisha la xiriirta xabbad-joojinta Qaza waxa ay ka wadahadleen weftiga ammaanka ee Masar iyo weftiga Xamaas.
Ishan ayaa soo xigtay “horumar weyn” oo laga gaaray wadahadallada, iyada oo aan wax faahfaahin ah laga bixin.
Madaxa Xamaas Ismaaciil Haniyeh, ayaa dhankiisa ku eedeeyay Netanyahu in uu wiiqayo dadaallada lagu doonayo in lagu gaaro heshiis xabbad-joojin ah oo laga gaaro marinka Qaza.
Xamaas, oo la aaminsan yahay in ay haysato in ka badan 130 qof oo Israa’iiliyiin ah, ayaa dalbanaysa in la soo afjaro duullaanka joogtada ah ee Israa’iil ku hayso Qaza, si ay uga soo baxdo heshiis kasta oo ay la gashay Tel Aviv.
Israa’iil ayaa duqeysay Marinka Gaza, iyadoo ka aargoosanaysa weerar ka dhacay xuduudda oo ay hoggaaminayeen Xamaas, kaasoo lagu dilay illaa 1,200 oo qof. Ku dhawaad 34,700 oo falastiiniyiin ah ayaa tan iyo markii lagu dilay Gaza, kuwaas oo intooda badan ay ahaayeen haween iyo caruur, iyo 78,000 oo kale oo dhaawac ah, sida ay sheegeen maamulka caafimaadka Falastiin.
Ku dhawaad toddobo bilood oo uu socday dagaalka Israel, dhul ballaaran oo Gaza ah ayaa burburay, taasoo ku riixday 85% dadka deegaanka barakac gudaha ah iyada oo ay curyaamisay xannibaadda cuntada, biyaha nadiifka ah iyo daawada, sida ay sheegtay Qaramada Midoobay.
Maxkamadda caalamiga ah ee cadaaladda ayaa Israa’iil ku eedaynaysa xasuuq. Go’aan ku meel gaar ah oo la soo saaray bishii Janaayo ayaa lagu sheegay in ay “macquul tahay” in Israa’iil ay xasuuq ka geysanayso Gaza, waxaana lagu amray Tel Aviv in ay joojiso falalkaas oo ay qaado tallaabooyin lagu dammaanad qaadayo in gargaarka bini’aadantinimo la siiyo dadka rayidka ah ee Gaza.
