Sahan Media Muqdisho: Warar kala duwan ayaa kasoo baxay hoobiyeyaal goordhow lagu garaacay agagaarka dhismaha xarunta madaxtooyada ee magaalada Muqdisho, kuwaas oo jugtooda si weyn looga maqlay gudaha caasimada.
Illaa 4 hoobiye ayaa la sheegay inay ku dhaceen xaafaddo aad ugu dhow chaw xarunta madaxtooyada, gaar ahaan degmooyinka Warta Nabadda iyo Boondheere ee gobolka Banaadir.
Wararku waxay sheegayaan in mid kamid ah madaafiicda uu ku dhacay Tiyaatarka Qaranka, waxaana ku dhaawacmay qaar ka mid ah shaqaalaha Tiyaatarka.
Hoobiyaal kale oo ku dhacay barxadda Warta Nabadda ayaa waxaa ku dhaawacay laba qof, sidoo kale in mid kale ayaa ku dhacay guri ay dagan yihiin dad shacab ah oo ku yaalla degmada Boondheere ee gobolka Banaadir.
Xaaladda ayaa hadda ah mid deggan, waxaana si caadi ah u socda dhaq-dhaqaaqa waddooyinka soo gala iyo kuwa ka baxa madaxtooyada.
