Sahan Media Muqdisho: Safiirka Shiinaha u fadhiya Nigeria, Yu Dunhai, ayaa ku dhawaaqay qorshayaasha dalkiisa ee lagu dhisayo xarun wax-soo-saar insulin maxalli Afrika ah.
Yu waxa uu shalay ka sheegay Abuja xaflad lagu xusayay sannad-guuradii 76-aad ee ka soo wareegtay aasaaskii Jamhuuriyadda Dadka Shiinaha.
Waxa uu sheegay in tani ay wax ka bedeli doonto maareynta heerarka gulukooska dhiigga, ka hortagga dhibaatooyinka la xiriira cudurka macaanka, iyo soo afjarida ku tiirsanaanta dalka ee insulinta dibadda laga keeno.
Shirkadaha Shiinaha ayaa wadahadalo kula jira Nigeria si ay u dhisaan xaruntii ugu horreysay ee wax soo saarka insulin ee gudaha Afrika, taas oo suurtagal ah in la soo afjaro ku tiirsanaanta Nigeria ee insulinta dibadda laga keeno iyo in Nigeria laga dhigo xudunta cilmiga bayoolajiga caafimaadka Afrika.
“Mashruucan waa qayb ka mid ah faa’iidooyinka la taaban karo ee iskaashiga Shiinaha iyo Nigeria, oo ay weheliso mashruuca biyo-gelinta Abuja ee dhowaan la dhammeeyey, oo leh awood maalinle ah 480 mitir kuyuub ah, kaas oo hadda bixiya biyo nadiif ah ku dhawaad saddex milyan oo qof,” ayuu yidhi.
Yu waxa kale oo uu iftiimiyay taageerada muddada dheer ee Shiinaha ee horumarinta Afrika taas oo kobcisa qaab iskaashiga siman, dhab ah, oo hufan.
Waxa uu sheegay in Shiinuhu ay ka go’an tahay taageeridda is-dhexgalka Afrika iyo kor u qaadida awooddeeda horumarineed ee ay iskeed isu maamusho.
