Sahan Media Muqdisho: Booliska Kenya ayaa sheegay inay ka hortageen weerar ay fuliyeen dagaalyahanno looga shakisan yahay Al-Shabaab oo lagu qaaday saldhig amni oo ku yaalla deegaanka Fino ee gobolka Mandheera, oo ku dhow xadka Soomaaliya.
Sida ay sheegeen saraakiisha ammaanka, koox aan tiradooda la shaacin ayaa weerarka qaaday fiidnimadii Jimcaha, hase yeeshee ciidamada ammaanka ayaa si degdeg ah uga falceliyay, iyagoo dib u riixay dagaalmayaasha Al-shabaab.
Warbixin ay boolisku soo saareen ayaa lagu sheegay in intii uu weerarku socday arday lagu dhaawacay rasaas kaga dhacday caloosha, isla markaana loo qaaday isbitaal, halkaas oo la sheegay in xaaladdiisu lagu dabiibayo.
Mas’uuliyiintu waxay sheegeen in howlgalka amni uu weli ka socdo deegaanka si loo xaqiijiyo amniga loogana saaro wax kasta oo khatar ah.
Goobjoogayaal ayaa sheegay in rasaas culus laga maqlay deegaanka Fino intii u dhexeysay 6:00 fiidnimo iyo 7:00 fiidnimo, iyadoo weerar kale oo la mid ah sidoo kale laga soo wariyay deegaanka Arabia saacad kadib. Rasaas kale ayaa laga maqlay aagga Asharaf ee gobolka Mandheera.
Gobollada waqooyi-bari ee Kenya, gaar ahaan Mandheera, ayaa muddooyinkii la soo dhaafay la kulmayay weerarro ay dowladda Kenya ku eedeyso Al-Shabaab, tan iyo markii Kenya ay ciidamo usoo dirtay Soomaaliya sanadkii 2011 si ay ula dagaallamaan kooxda.
Dhacdadan ayaa ku soo beegmaysa iyadoo Kenya ay sare u qaaday tallaabooyinka amniga, kadib hanjabaado ay Al-Shabaab hore u jeedisay oo la xiriiray joogitaanka ciidamada Kenya ee ku sugan xadka iyo gudaha Soomaaliya.
