Sahan Media Muqdisho: Shil baabuur oo ay ku lug lahaayeen gaadiid badan oo ka dhacay mid ka mid ah waddooyinka waaweyn ee Koonfur Afrika ayaa sababay dhimashada 21 qof.
Shilkan oo ka dhacay waddada weyn ee N1 saacadihii hore ayaa waxaa ku lug lahaa laba gaari oo nooca basaska yaryar ah (minibus taxis) iyo gaari nooca SUV-ga ah oo ah nooca Suzuki, sida ay weriyeyaasha u sheegeen afhayeenka booliiska, Warrant Officer Christopher Spies.
Shilka ka dhacay Western Cape, oo ah gobolka ugu koonfureed dalka Koonfur Afrika, ayaa ka mid ahaa laba shil oo waaweyn oo dalka ka dhacay labadii maalmood ee la soo dhaafay. Siddeed qof ayaa ku dhintay shil kale oo ka dhacay meel u dhow magaalada Ermelo ee gobolka Mpumalanga subaxnimadii Axadda. Shilalka waddooyinka ee dhimashada sababa ayaa ah dhibaato soo noqnoqota oo ka jirta Koonfur Afrika.
Shilkii Isniinta ayaa sababay in la xiro wadada weyn ee N1 oo ku taal masaafo dhan 380km (240 mayl) dhanka bari kaga beegan magaalada Cape Town, gaar ahaan inta u dhaxaysa magaalooyinka yaryar ee Prince Albert iyo Leeu-Gamka, sida ay sheegtay Hay’adda Maamulka Gaadiidka Waddooyinka (RTMC).
Tirada dadka dhintay “waxaa laga yaabaa inay isbeddesho iyadoo adeegyada gurmadka degdegga ah iyo mas’uuliyiinta gobolka Western Cape ay sii wadaan qiimeynta goobta shilka,” sida ay sheegtay hay’adda badbaadada waddooyinka.
Siddeed iyo toban qof ayaa lagu xaqiijiyay inay ku dhinteen goobta shilka, halka saddex kalena la sheegay inay dhinteen ka dib markii la geeyay isbitaalka, taasoo tirada guud ka dhigaysa 21 qof, sida uu sheegay Spies. Afar qof oo kale ayaa si xun u dhaawacmay.
Ku dhawaad ​​11,500 oo qof ayaa ku dhintay shilal waddooyinka ka dhacay sanadkii 2025-kii, sida ay sheegtay Wasaaradda Gaadiidka ee dalkaas.
