Sahan Media Muqdisho: Golaha Ammaanka ee Qaramada Midoobay ayaa maanta cod aqlabiyad ah ku cusbooneysiiyay muddada guddiga la socodka cunaqabateynta saaran Al-Shabaab.
Dhammaan 15-ka xubnood ayaa u codeeyay tallaabadan, taasoo kordhinaysa ogolaanshaha kormeerka ciidamada badda si loo dhaqan geliyo cunaqabateynta hubka ee saaran Soomaaliya, iyo sidoo kale mamnuucidda dhoofinta dhuxusha iyo xakameynta walxaha qarxa, illaa 30-ka Nov, 2026.
Tallaabooyinka kale ee cunaqabataynta, oo ay ku jiraan mamnuucida safarka, xannibaadda hantida iyo cunaqabataynta hubka, ayaa weli ah mid furan.
“Waxaan uga mahadcelineynaa dhammaan xubnaha Golaha habka wax ku oolka ah ee ay u wajaheen wada xaajoodyada, taas oo noo suurtagelisay inaan gaarno natiijadan la isku raacsan yahay,” ayuu yiri James Kariuki, u-qaabilsanaha Britain ee Qaramada Midoobay. UK, iyada oo qalinka ku duugaysa arrimaha Soomaaliya, ayaa hormuud ka ahayd wadahadallada qoraalka ah.
Wuxuu soo dhaweeyay qaadashada qoraalka, isagoo u sheegay xubnaha Golaha inay xoojinayaan dadaallada lagu xakameynayo helitaanka hubka kooxda argagixsada, carqaladeynta dhaqaalaha iyo taageeridda Soomaaliya si kor loogu qaado awoodeeda.
Al-shabaab ayaa in ka badan 16-sano waxa ay wadday dagaallo ka dhan ah dowladda Soomaaliya, iyagoo inta badan beegsada ciidamada ammaanka, saraakiisha iyo dadka rayidka ah.
Tan iyo dabayaaqadii sannadkii 2024-kii, ciidamada xoogga dalka iyo kuwa nabad sugidda ee maamul-goboleedka Puntland waxay kordhiyeen howlgallada ka dhanka ah Al-shabaab ee ka socda gobollada Koonfurta, bartamaha dalka, iyo Daacishta (Daacish) ee gobolka Waqooyi-bari, iyagoo taageero ka helaya saaxiibo caalami ah.
Bishii la soo dhaafay, dowladdu waxay sheegtay in 220 duqeymo oo sax ah la fuliyay, waxaana lagu dilay 868 dagaalyahan tan iyo bishii Febraayo.
