Sahan media Muqdisho: Madaxweynaha Jamhuuriyadda Azerbaijan Ilham Aliyev ayaa warqadaha aqoonsiga danjiranimo ka guddoomay Fatxudin Ali Mohamed, oo ah safiirka cusub ee Jamhuuriyadda Federaalka Soomaaliya, ee loo soo magacaabay.
Safiirka ayaa warqadihiisa aqoonsiga u gudbiyay madaxda qaranka. Madaxweyne Ilham Aliyev ayaa wada hadal la yeeshay safiirka.
Fatxudin Ali Mohamed oo ugu hambalyeeyay Asarbayjan marti gelinta COP29 ayaa xusay in Madaxweynaha Soomaaliya uu ka qeyb gali doono Munaasabadan, isagoo carabka ku adkeeyay in kulanka soo socda ee Madaxweynayaasha Asarbayjaan iyo Soomaaliya inta lagu guda jiro COP29 uu wax weyn ka tari doono horumarinta xiriirka labada dal.
Safiirka ayaa xusay in iskaashiga labada dhinac uu sii xoogeysanayo maalinba maalinta ka dambeysa. Wuxuu taabtay iskaashiga dhinacyada sayniska iyo waxbarashada, isagoo xusay in arday badan oo Soomaaliya ka timid ay wax ku soo barteen Asarbayjaan xilligii Midowga Soofiyeeti, waxayna muujiyeen inay daneynayaan in la sii wado dhaqamadaas.
Madaxweyne Ilham Aliyev ayaa qiray suurtagalnimada weyn ee lagu ballaarinayo iskaashiga ganacsiga, dhaqaalaha, iyo qaybaha kale.
Intii ay wada sheekadu socotay waxa ay ku nuuxnuuxsadeen muhiimadda ay leedahay in la sameeyo xiriirro heerar kala duwan leh, waxaana ay bogaadiyeen iskaashiga ka dhexeeya labada dal iyo hay’adaha caalamiga ah oo uu ka mid yahay ururka iskaashiga Islaamka.
