Sahan Media Muqdisho: Sarkaal sare oo ka tirsan ciidamada Suudaan ayaa la dilay subaxnimadii Talaadada intii lagu jiray mowjado weeraro ah oo ay fuliyeen diyaaradaha aan duuliyaha lahayn ee Khartoum.
Major-General Abu Cubieda Fadlallah Ibrahim, oo ah agaasimaha amniga militariga ee militariga Sudan iyo ku xigeenka agaasimaha sirdoonka militariga ayaa la dilay markii diyaaradaha aan duuliyaha lahayn ay duqeeyeen dhismaha sirdoonka Militariga ee Khartoum Bahri ee degmada Kafouri, sida ay sheegeen ilo-wareedyo dhanka ammaanka ah iyo dadka deegaanka oo la hadlay Sudan Post.
“Wuxuu ku sugnaa gudaha xarunta sirdoonka militariga ee Kafouri, markii mid ka mid ah diyaaradaha aan duuliyaha lahayn ay si toos ah u garaacday dhismaha, duqeynta ayaa sababtay burbur weyn, waxaana la xaqiijiyay in Abu Ubiida uu ku dhintay goobta iyo dhowr sarkaal oo kale oo gudaha ku jiray,” ayaa lagu yiri war-saxaafadeedka.
Jeneraalka ayaa saacado ka hor weerar ka soo laabtay warbixin caadi ahna siinayay madaxdiisa, waxaa uu ku sugnaa xafiiskiisa markii ay soo dhacday diyaaradda aan duuliyaha lahayn. Ciidanka ayaa isku dayay in ay si deg deg ah u sugaan ammaanka goobta, balse khasaaraha ayaa durba gaaray, dhismahana muddo saacado ah ayuu gubanayay.”
Major General Fadlallah waxa uu ka soo jeedaa bariga gobolka Qadarif, waxaana uu hore u soo noqday u qaybsanaha militariga Suudaan ee Itoobiya.
Dhimashada Jeneraal Fadlallah ayaa ah tii ugu dambeysay ee taxane ah oo khasaare gaar ah leh oo soo gaarta ciidanka,
Diyaaradaha aan duuliyaha lahayn ee Drones-ka ayaa socday in ka badan saddex saacadood, iyagoo garaacay goobo badan oo ku yaalla saddexda magaalo ee caasimadda Khartoum. Goobaha sida aadka ah u saameeyay ayaa waxaa ka mid ah xarunta is bedelka korontada ee Murkhiyat ee magaalada Omdurman, halkaasi oo lagu arkayay dab xooggan kadib markii diyaaradaha aan duuliyaha lahayn ay burburiyeen transformers-ka muhiimka ah.
Fiidiyow ku dhex wareegayay khadka ayaa muujiyay weeraro toos ah oo ay diyaaradaha aan duuliyaha lahayn ku qaadeen xarunta Murkhiyaat subaxnimadii xilli ay qorraxdu soo bixi lahayd, kaas oo uu duubay qof degan koonfurta saldhigga.
Goob joogayaal ku sugan deegaanka Karari oo dhanka waqooyi kaga beegan magaalada Cumdurmaan ayaa sheegay in qaraxyo is xig xiga ay ka dhaceen meel u dhow saldhigga ciidamada Waadi Saedna. Qiiq culus ayaa sidoo kale la arkayay oo ka kacaya xarumaha warshadaha iyo tamarta ee Bahri, oo ay ku jiraan dhismaha ciidamada Yarmuuk iyo warshada saliidda ee Jaily.
Shirkadda Korontada ee Suudaan ayaa war kooban oo ay soo saartay ku xaqiijisay in “qayb go’an” ay saamaysay Omdurman ka dib weerarrada, inkastoo aysan bixin faahfaahin dheeraad ah. Dadka deegaanka ayaa sheegay in koronta la aantu ay ku fiday qeybo badan oo magaalada ah, taasoo keentay in biyaha iyo isgaarsiintu ay go’aan.
Ciidanka Suudaan ayaan wali wax war ah kasoo saarin geerida Sarreeye Gaas Fadlallah. Dhaqan ahaan, ogeysiisyada dhimashada saraakiisha sare ayaa la sameeyaa maalmo ama xitaa toddobaadyo ka dib dhacdada, oo inta badan lagu soo beego booqashooyin heer sare ah oo saraakiisha ay ku tagaan qoysaska taliyayaasha la dilay.
Isbahaysiga Aasaaska Suudaan ee RSF-ta uu hoggaamiyo (Ta’sis) ayaa sheegtay mas’uuliyadda weerarrada diyaaradaha aan duuliyaha lahayn, iyaga oo sheegay in ay uga aargudanayeen howlgallada ciidammada Qalabka Sida ee Suudaan (SAF) ee Darfur iyo Kordofan.
