Sahan Media Muqdisho: Madaxweynaha Soomaaliya Xasan Sheekh Maxamuud ayaa ku boorriyay mas’uuliyiinta Somaliland inay wada hadal la yeeshaan dowladdiisa, isagoo sheegay inuu u furan yahay inuu wax walba ka tanaasulo marka laga reebo “Midnimada dalka”.
Hadalka Xasan ayaa ku soo beegmaya xilli uui socdaal ku tegay magaalo-madaxda maamul-goboleedkaas Waqooyi Bari oo ay sidoo kale sheegteen maamulka la baxay Somaliland, taasoo noqonaysa booqashadii ugu horreysay ee Madaxweyne Soomaaliyeed oo muddo 40-sano ka badan uu ku tago dalkaas.
Waxa kale oo uu sheegay in tallaabadii Israa’iil ay ku aqoonsatay Somaliland laga diiday caalamka, isagoo carrabka ku adkeeyay in midnimada Soomaaliya ay tahay mid aan gorgortan laga geli karin.
Madaxweynaha ayaa booqasho ku tagay magaalada Laascaanood ee xarunta maamulka gobolka Sool, si uu uga qaybgalo xafladda dhaarinta madaxweynaha maamulka la dhisayo ee Waqooyi Bari oo bishii August noqday maamulkii lixaad ee Soomaaliya ka tirsan.
Booqashada madaxweynaha “Waxay astaan u tahay xoojinta midnimada iyo dadaalka dowladda federaalka ah ee ku aaddan xoojinta midnimada dhuleed ee dalka iyo dadka Soomaaliyeed.
Sidoo kale Xasan Sheekh Maxamuud ayaa kulan la qaatay, qaar ka mid ah Odayaasha, Isimmada iyo Cuqaasha dhaqanka Dowlad-goboleedka Puntland oo uu hoggaaminayo Boqor Burhaan Boqor Muuse, kuwaasi oo ka qayb galay, Munaasabadda caleemo-saarka Madaxda Dowlad-goboleedka Waqooyi Bari Soomaaliya.
Madaxweynaha Jamhuuriyadda ayaa hoggaanka dhaqanka ku adkeeyey in ay qaataan doorkooda muhiimka ah ee ilaalinta gobanimada iyo midnimada dalka, xoojinta nabadda, dowlad-dhiska iyo horumarka, isaga oo ku bogaadiyay doorkooda soo jireenka ah ee isku haynta bulshada Soomaaliyeed.
Kulankan waxaa ka qayb galay Wasiiro ka tirsan Xukuumadda, Taliyaha Ciidanka Booliska Soomaaliyeed, Saraakiil ciidan iyo siyaasiyiin ka soo jeeda deegaanada Puntland.
