Sahan Media Muqdisho: Madaxdii hore iyo siyaasiyiinta mucaaradka ah ayaa warsaxafadeedka ay soo saareen ku cadeeyay iney dhimatay Madashii Golaha Wadatashiga Qaranka, islamarkaana madaxweyne Xasan Sheekh uu la weecday doorkii laga sugaayay ee ahaa isku keenida dowladda federaalka, dowlad goboleedyada iyo siyaasiyiinta mucaaradka ah.
Warsaxafadeedka ayaa si weyn loogu eedeeyay in madaxweyne Xasan Sheekh inuu doorbiday kooxaysi siyaasadeed, halkii laga filaayay inuu noqdo hoggaamiye qaran.
Waxaa sidoo kale Warsaxafadeedka loogu digay Madaxweyne Xasan Sheekh Maxamuud inuu ka waan toobo falal ay ku sheegeen “fidno abuur” uu ka wado maamulka Jubbaland oo ay sheegeen inuu ku haayo caburin la xariirta madax bannaanida maamulkaasi.
Warsaxafadeedkan ayaa waxaa si wadajir ah ugu saxiixan 16 masuul oo hore u soo qabtay xilal kala duwan oo sida madaxweyne, Raysal Wasaarayaal, Wasiirro, Ambassadoro, iyo Hoggaamiyeyaal siyaasadeed, kuwaas oo ay ka mid yihiin Madaxweynihii hore ee Soomaaliya Shariif Sheekh Axmed, Raysal wasaareyaashii hore ee Xasan Cali Khayre, Maxamed Xuseen Rooble, Cumar C/rashiid Cali Sharmaarke, Cabdi Faarax Shirdoon (Saacid) Iyo siyaasiyiin kale oo caan ah.
