Sahan Media Muqdisho: Soomaaliya iyo Itoobiya ayaa sii wada wadahadalka si ay u sii xoojiyaan xiriirka labada dal ka dib markii ay soo afjareen cadaawad muddo sanad ah ama wax ka badan ka dib dhexdhexaadintii Turkiga taasoo keentay Baaqii Ankara ee Diseembar 2024.
Wadahadalkii ugu dambeeyay wuxuu dhex maray Gedion Timothy, Wasiirka Arrimaha Dibadda ee Itoobiya, iyo Wasiiru Dowlaha Arrimaha Dibadda ee Soomaaliya, Ali Mohamed umer oo ku sugan Itoobiya si uu uga qeyb galo Shirka Tana Forum oo looga hadlayo “Amniga Afrika”.
Labada dhinac ayaa ka wada hadlay xoojinta xiriirka laba geesoodka ah iyadoo loo marayo wadashaqeyn joogta ah. Waxa ay sidoo kale sahmiyeen istaraatiijiyadaha isku xirka howlgalka Midowga Afrika ee Taageerada iyo Xasilinta Soomaaliya (AUSSOM) waxayna xaqiijiyeen sida ay uga go’an tahay kor u qaadista dadaallada wadajirka ah ee lagula dagaallamayo argagixisada gobolka.
Waxaa xusid mudan in Xasan Sheekh Maxamed uu toddobaad ka hor ku sugnaa dalka Itoobiya, taasoo qayb ka ahayd dadaallada ay labada dal ku xoojinayaan xiriirkooda.
