Sahan Media Muqdisho: Uganda ayaa ogolaatay inay soo dhawayso muwaadiniinta ka soo jeeda dalal saddexaad oo laga yaabo in laga diiday magangalyo Maraykanka, laakiin aan doonayn inay ku noqdaan dalalkii ay ka yimaadeen, ayay tiri wasaaradda arrimaha dibadda ee Kampala.
Wasaaradda ayaa Khamiistii sheegtay in heshiisku uu ku saleysan yahay in dadka magan-galyo doonka ah aysan lahayn dambiyo iyo in aysan ahayn carruur aan qaangaar ahayn, iyadoo intaas ku dartay in faahfaahinta heshiiska ay weli socoto.
Madaxweynaha Mareykanka Donald Trump ayaa damacsan inuu masaafuriyo malaayiin muhaajiriin ah oo aan sharci heysan, iyadoo maamulkiisu uu doonayo inuu kordhiyo musaafurinta dalalka saddexaad.
Qiyaastii 1.7 milyan, Uganda waxay horey u martigelisay qaxootiga ugu badan ee Afrika, sida ay sheegtay Qaramada Midoobay, waana waddankii ugu dambeeyay ee Bariga Afrika ee ku dhawaaqa heshiiskan oo kale Washington, isagoo ku biiray Rwanda iyo South Sudan.
“Tani waa go aan ku meel gaar ah oo ay ku jiraan shuruudo ay ka mid yihiin in shakhsiyaadka leh diiwaannada dembiyada iyo carruurta aan lala socon aan la aqbali doonin,” Vincent Bagiire Waiswa,Xoghayaha joogtada ah ee wasaaradda, ayaa qoraal uu soo saaray ku sheegay.
Waxa uu sidoo kale sheegay in Uganda ay door bidayso in “shakhsiyaadka ka socda dalalka Afrika ay noqon doonaan kuwa loo wareejiyo Uganda”.
“Labada dhinac waxay ka shaqaynayaan qaab faahfaahsan iyo sida heshiiska loo fulin lahaa,” ayuu yiri.
Ma cadda in heshiiska la saxiixay iyo in kale, balse qoraalka wasaaradda ayaa lagu sheegay in “la soo gebagabeeyay”.
