Sahan Media Muqdisho: Madaxweyne ku xigeenka Mareykanka JD Vance ayaa sheegay in wadahadaladii u dhaxeeyay Mareykanka iyo Iran ay ku dhamaadeen aroornimadii hore ee Axada iyadoo aan la gaarin heshiis nabadeed ka dib markii Iraniyiintu ay diideen in ay aqbalaan shuruudaha Mareykanka ee ah in aan la sameynin hubka nukliyeerka.
Wadahadalladii xiisaha badnaa ee Pakistan ayaa dhammaaday 21 saacadood ka dib, ayuu yiri Vance, iyadoo madaxweyne ku xigeenka uu xiriir joogto ah la yeeshay madaxweynaha Mareykanka Donald Trump iyo kuwa kale oo ka tirsan maamulka.
“Laakiin xaqiiqda sahlan ayaa ah inaan u baahanahay inaan aragno ballanqaad dhab ah oo ah inaysan raadin doonin hubka nukliyeerka, mana raadin doonaan qalabka u suurtagelinaya inay si dhaqso ah u gaaraan hubka nukliyeerka,” Vance ayaa u sheegay suxufiyiinta.
Wafdiga Mareykanka oo uu hogaaminayay Vance iyo wafdiga Iran ee uu hogaaminayay afhayeenka baarlamaanka Mohammad Bagher Qalibaf ayaa ka wada hadlay sidii loo sii ambaqaadi lahaa xabad-joojin ay horay ugu hanjabeen khilaafaad qoto dheer iyo weerarada joogtada ah ee Israel ay ku beegsaneyso kooxda Xisbullah ee ay Iran taageerto ee Lubnaan.
Ka dib dhamaadkii wareegii ugu dambeeyay, kooxaha khabiirada ee labada dhinac waxay sii wadeen inay is dhaafsadaan qoraalo qoran taasoo qayb ka ah habka gorgortanka.
Wadahadallada ayaa soo idlaaday 3:12 subaxnimo ee xilliga gudaha, sida ay sheegtay warbaahinta Iran.
Ilo-wareedyadu waxa ay sheegeen in khilaafaadka culus ee u dhexeeya wufuudda Iran iyo Maraykanka aan weli la xallin, iyaga oo intaa ku daray in horumarku uu ku xidhan yahay haddii Maraykanku ka weecdo mawqifka dhabta ah.
Wareeg kale oo wadahadal ah ayaa loo qorsheeyay Axadda codsi ka yimid Pakistan, iyadoo labada Iran iyo Mareykanka ay ku heshiiyeen inay ka qaybgalaan, sida ay sheegtay shabakadda IRIB ee ay dowladdu maamusho.
