Sahan Media Muqdisho: Ugu yaraan 139 qof, oo ay ku jiraan 15 carruur ah, ayaa dhintay, halka 84 kalena ay la’yihiin ka dib markii doon ay ku rogmatay xeebaha dalka Jabuuti, sida ay sheegtay hay’adda Qaramada Midoobay u qaabilsan arrimaha muhaajiriinta.
Warsaxaafadeed ay soo saartay Axaddii, Hay’adda Caalamiga ah ee Socdaalka (IOM) ayaa soo xigatay dadkii ka badbaaday musiibada oo sheegay in dhacdadu ay ka dhacday meel u dhow Guhere, oo ku taal xeebta bari ee Jabuuti iyo Gacanka Cadmeed, una dhow marinka Bab al-Mandeb.
Doonidda ayaa ka soo ambabaxday Jabuuti iyadoo ku sii jeedda Yemen, waxaana saarnaa dad ka badan 300 oo qof. In ka badan 80 qof – oo dhammaantood u dhashay Itoobiya – ayaa ka badbaaday musiibadaas, iyadoo ay weli socdaan hawlgallada raadinta iyo samatabbixinta ee ay wadaan mas’uuliyiinta Jabuuti.
“Kooxaheennu waxay joogaan goobta iyagoo kaashanaya mas’uuliyiinta maxalliga ah si ay u bixiyaan gargaar degdeg ah,” ayuu yiri Alexandre Coissac, oo ah madaxa hawlgalka hay’adda IOM ee Jabuuti, isagoo ka murugooday “luminta nolosha dadka ee aadka u xanuunka badan”.
Tiradaas waxaa ku jira oo kaliya dadka ay aaseen mas’uuliyiinta Jabuuti. Dad kale waxaa aasay isla muhaajiriinta, balse lama sheegi doono tirada rasmiga ah ilaa ay mas’uuliyiintu xaqiijiyaan meydadka, sida uu wakaaladda wararka ee Associated Press u sheegay Alexandre Coissac.
“Musiibadani waa xasuusin cad oo ku saabsan khataraha ay la kulmaan muhaajiriinta ka safraya waddadan marka ay raadinayaan fursado dhaqaale,” ayuu raaciyay Coissac.
