Sahan Media Muqdisho: Dadaallada lagu doonayo in lagu sii daayo badmaaxiinta Masaarida ee saaran markabka shidaalka MT Eureka, oo lagu afduubay meel u dhow xeebaha Soomaaliya, ayaa wajahaya caqabado cusub, kaddib markii uu burburay heshiis hordhac ah oo la xiriiray lacagta madax-furashada.
Qoysaska qaar ka mid ah badmaaxiinta ayaa sheegay in wadaxaajoodyadu ay gaareen heer wanaagsan, isla markaana lagu heshiiyay in la bixiyo 2 milyan oo doolar si loo sii daayo markabka iyo shaqaalihiisa. Hase yeeshee, waxay sheegeen in milkiilaha markabka uu markii dambe dalbaday in lacagta loo dhimo 500 kun oo doolar, taasoo sababtay in wadaxaajoodyadii dib u dhacaan.
Qoysaska badmaaxiinta ayaa muujiyay walaac xooggan, iyagoo sheegay in isbeddelka ku yimid heshiiska uu sii adkeeyay xaaladda dadka la haysto, waxayna ugu baaqeen dowladda Masar iyo dhammaan dhinacyada ay khusayso inay dedejiyaan xal lagu soo afjaro arrintan.
Dhanka kale, Wasaaradda Arrimaha Dibadda ee Masar ayaa sheegtay inay sii waddo xiriirro ay la leedahay mas’uuliyiinta Soomaaliya iyo dhinacyada kale ee arrintan ku lugta leh, si loo xaqiijiyo badqabka badmaaxiinta loona dedejiyo sii deyntooda.
Markabka MT Eureka ayaa la afduubay horaantii bishii May, waxaana saaran 12 badmaax oo ay ku jiraan 8 Masaari iyo 4 Hindi ah, kuwaas oo weli lagu hayo meel u dhow xeebaha Soomaaliya.
