Sahan Media Muqdisho: Kooxda xaqiijinta xaqiiqooyinka ee BBC-da ayaa baaritaan ku samaysay sawirro dayax-gacmeed laga qaaday garoonka diyaaradaha Berbera iyo xarun badeed ku dhow, kuwaas oo muujinaya dhismooyin iyo qodis socday sannado badan. Hawlahan dhismaha ayaa keenaya su’aalo ku saabsan in ay yihiin mashaariic ku kooban kaabayaasha dhaqaalaha iyo ganacsiga oo keliya, mise ay sidoo kale noqon karaan kuwo mustaqbalka loo adeegsan karo ujeeddooyin militari.
Booqashadii Cirro ee Israa’iil ayaa dhalisay su’aalo ku saabsan heerka iskaashi amni iyo mid militari ee laga filayo labada dhinac, gaar ahaan kaddib markii uu wareysi telefishan ku sheegay in samaynta saldhig militari oo Israa’iili ah oo Somaliland laga dhiso “aanay ahayn arrin meesha ka baxsan”.
Hadallada Cirro waxay yimaadeen bilo kaddib markii Israa’iil ay aqoonsatay Somaliland, oo sannadkii 1991 si hal dhinac ah ugu dhawaaqday inay ka go’day dowladda dhexe ee Muqdisho.
Intii lagu guda jiray booqashadaas, sidoo kale wasiirka difaaca Somaliland, Maxamed Yuusuf, ayaa sheegay in Israa’iil ay tababar siiso ciidamada booliska iyo kuwa milatariga ee gobolka, sida ay sheegtay wakaaladda Reuters.
Intaa waxaa dheer, wasiirka difaaca Israa’iil, Israel Katz, ayaa xaqiijiyay in Israa’iil iyo Somaliland ay si qarsoodi ah u wada shaqeynayeen sannado badan. Tani waxay qayb ka tahay tallaabooyin isdaba joog ah oo muujinaya jiritaanka iskaashi diblomaasiyadeed iyo mid amni oo dhow oo u dhexeeya labada dhinac, tan iyo markii Israa’iil ay aqoonsatay Somaliland bishii Diseembar ee la soo dhaafay, ilaa markii Somaliland ay dhawaan safaarad ka furtay Qudus.
Katz ayaa xaqiijiyay in labada dhinac ay “go’aansadeen inay sare u qaadaan iskaashiga amni ee ka dhexeeya, taas oo dan u ah labada shacabka iyo xasiloonida gobolka.”
