Sahan Media Muqdisho: Eritrea ayaa Sabtidii ka codsatay Golaha Ammaanka ee Qaramada Midoobay inay tallaabooyin ciqaab ah ka qaadaan Itoobiya sida lagu sheegay warqad ay aragtay wakaaladda wararka ee Reuters iyadoo ku doodaysa in eedeymaha Addis Ababa ee ku saabsan duullaan ay qaadeen ciidamada Eritrea ay u dhiganto “ku dhawaaqid dagaal”.
Gudaha u soo gelitaanka ciidamada Eritrea waa arrin ay Asmara beenisay, isla markaana aysan Reuters si madax-bannaan u xaqiijin karin arrintan ayaa kicisay walaac laga qabo in dib loogu laabto dagaal baahsan oo ka dhaca xadka waqooyi ee Itoobiya, halkaas oo ay horey isugu dhaceen labadan waddan ee deriska ah.
Khilaafaadka ka jira meelo kale oo gobolka ah iyo xiisadaha ka jira Badda Cas ayaa sii kordhiyay khatarta.
Wasiirka Arrimaha Dibadda ee Eritrea, Cusmaan Saalax, ayaa warqadda ku sheegay in sheegashada duullaanka ay qayb ka tahay qorshe Itoobiya ay ku qiil-sameyneyso dagaal gardarro ah. Wuxuu ku boorriyay Qaramada Midoobay inay soo farageliso.
“Eritrea waxay ka codsaneysaa Golaha Ammaanka ee Qaramada Midoobay inay si xoog leh u cambaareeyaan ku dhawaaqista xun ee Itoobiya ee dagaalka ka dhanka ah Eritrea … oo ay qaadaan tallaabooyinka looga hortagayo ee loo baahan yahay iyadoo la raacayo Cutubka VII ee Axdiga Qaramada Midoobay,” ayuu qoray.
Cutubka VII wuxuu ogolaanayaa tallaabooyin u dhexeeya cunaqabatayn ilaa tallaabo milatari, inkastoo Cusmaan uusan cayimin tallaabooyinka ay Eritrea ku baaqayso.
Dalka Itoobiya ayaa maalintii Jimcaha warqad u diray xubnaha Golaha Ammaanka, isagoo ku sheegay in ciidamada Eritrea ay maalmihii u dambeeyay gudaha u galeen gobolka waqooyi ee Tigray masaafo dhan 60 kiiloomitir (37 mayl). Waxayna uga digtay in joogitaanka ciidamada shisheeye uu Addis Ababa u reebay ikhtiyaar aan ka ahayn inay is-difaacdo.
