sahan media Muqdisho: Daadad ayaa 58 qof ku dilay Tanzania labadii toddobaad ee la soo dhaafay, taas oo ku kicisay dalka ku yaal Bariga Afrika inuu jawaab u raadiyo mashaariicda waaweyn ee kaabayaasha.
Dowladda ayaa ku dhawaaqday tirada dhimashada xilli dambe oo Axadii iyadoo roobab mahiigaan ah ay weli ka da’ayaan dalka. Bisha April ayaa ah tii ugu sareysay ee xilli roobaadka Tansaaniya, waxaana sanadkan uga sii daray cudurka El Nino, kaasoo sababay abaaro iyo fatahaado ka dhacay caalamka.
“Laga soo bilaabo Abriil 1 ilaa Abriil 14, 2024, waxaa jiray 58 dhimasho ah oo ay sababeen roobabka lixaadka leh, kuwaas oo horseeday daadad,” afhayeenka dowladda Mobhare Matinyi ayaa u sheegay shir jaraa’id, isagoo ku nuux-nuuxsaday in gobolka xeebta ee dalka uu ka mid yahay kuwa ugu daran.
“Saameyn culus oo daadad ayaa laga dareemay gobolka xeebta halkaasoo 11 qof ay ku dhinteen,” ayuu raaciyay. Tansaaniya waxa ay wadaa qorshayaal ay ku dhisayso 14 biyo-xireen ah si ay uga hortagto fatahaad mustaqbalka, ayuu yidhi afhayeenku.
Afar bilood ka hor, ugu yaraan 63 qof ayaa ku dhintay daadad ka dhacay waqooyiga Tansaaniya oo sidoo kale dhaliyay dhul go’yo badan.
Jimcihii, siddeed carruur ah oo iskuul ah ayaa ku qaraqmay ka dib markii baskii ay saarnaayeen uu ku dhacay tog daadad ah oo ku yaal waqooyiga dalka.
