Sahan media Muqdisho: Soomaaliya ayaa tababartay ku dhawaad 200 oo shaqaale ah oo ka tirsan Hay’adda Maareynta Musiibooyinka Qaranka Soomaaliyeed (SoDMA) oo gacan ka heleysa Turkiga oo helay xirfadaha gargaarka degdegga ah ee lagama maarmaanka u ah xaaladaha degdegga ah ee la xiriira caafimaadka.
Tababarkan oo socday muddo bil ah ayaa waxaa lagu qabtay Isbitaalka Tababarka iyo Cilmi-baarista Turkiga ee Muqdisho Somali Turkish, kaasoo sidoo kale loo yaqaan Isbitaalka Erdogan.
Mas’uuliyiin ka tirsan dowladda Soomaaliya oo uu ka mid yahay Wasiirka Arrimaha Gudaha Cali Yuusuf iyo Guddoomiyaha Hay’adda Maareynta Musiibooyinka Soomaaliya Maxamuud Macallin Cabdulle ayaa ka qeyb galay xiritaanka tababarka.
Safiirka Turkiga ee Soomaaliya Alper Aktas iyo Madaxa Bisha Cas ee Turkiga ee Soomaaliya Serif Simsek ayaa sidoo kale ka qeyb galay.
Ujeedada tababarka ayaa ah in loo diyaariyo shaqaalaha hay’adda sidii ay ula tacaali lahaayeen xaaladaha degdega ah ee ay ku jiraan masiibooyinka iyo xaaladaha degdegga ah iyo in gargaar caafimaad oo ugu horreeya la siiyo dhibanayaasha, sida lagu sheegay bayaan ay soo saartay SoDMA.
Yuusuf ayaa uga mahadceliyey hay’adaha Turkiga “taageerada hagar la’aanta ah ee ay siiyeen, wuxuuna ku booriyey shaqaalaha inay ka faa’ideystaan xirfadaha ay heleen si ay dadka u caawiyaan.”
Aktas ayaa sidoo kale xaqiijiyay sida ay Ankara uga go’an tahay sii wadida bixinta koorsooyinka tababarka si kor loogu qaado tayada shaqaalaha dowladda Soomaaliya.
Turkiga oo saaxiib dhow la ah Soomaaliya ayaa maalgeliyay waxbarashadiisa, kaabayaasha dhaqaalaha iyo caafimaadka, waxaana uu u fidiyay gargaar bani’aadanimo oo ballaaran.
Turkiga ayaa magaalada Muqdisho ku leh safaaradda ugu weyn ee Afrika, waxaana ay ka dhistay xaruntii ugu weyneyd ee ay ku tababari lahayd ciidamada xoogga dalka Soomaaliyeed.
