Sahan media Muqdisho: Madaxweynaha Kenya William Ruto ayaa ku dhawaaqay qeyb ka mid ah golahiisa wasiirada kadib todobaadyo ay socdeen dibadbaxyo looga soo horjeedo dowladda.
Khudbad uu Jimcihii ka jeediyay taleefishinka, Ruto ayaa ku dhawaaqay 11 magacaabis, oo ay ku jiraan lix xubnood oo ka tirsan golihii wasiirrada ee hore.
Kenya ayaa waxaa ruxay mudaaharaadyo socday muddo bil ah, kuwaasoo ku billowday isu soo bax nabadeed oo looga soo horjeedo canshuur kordhin, balse waxay u xuubsiibteen olole ballaaran oo ka dhan ah dowladda oo lagu dalbanayo in Ruto uu baxo.
Ugu yaraan 50 qof ayaa dhintay tan iyo markii ay mudaaharaadyadu billowdeen 18-kii June, sida uu sheegay guddiga qaran ee xuquuqul insaanka Kenya.
Toddobaadkii hore, Ruto ayaa shaqada ka ceyriyay ku dhawaad dhammaan golahiisa wasiirrada, oo ahaa mid ka mid ah tallaabooyin taxane ah oo ujeeddadiisu ahayd in la meel-mariyo dalabka mudaaharaadayaasha.
Ruto ayaa cinwaankiisa X ku sheegay in dhacdooyinkii bishii la soo dhaafay ay keeneen “walwal, walaac iyo hubanti la’aan”.
“Dhibaatadu waxay na siisay fursad weyn qaran ahaan si aan u samayno isbahaysi muwaaddiniin ah oo sal-ballaaran oo loo dhan yahay si loo helo isbeddel qaran iyo horumar ay ka kooban yihiin Kenyanka dhammaan qaybaha kala duwan ee bulshada,” Ruto ayaa ku yiri khudbaddiisa.
“Sidaas darteed, waxaan bilaabay habka lagu dhisayo gole wasiirro oo sal-ballaaran si ay gacan uga geystaan sidii loo wadi lahaa isbeddellada degdegga ah ee loo baahan yahay iyo isbeddellada aan laga laaban karin ee waddankeenna.”
Wasiirada arrimaha gudaha, gaashaandhigga, deegaanka iyo dhulka ayaa dib loo magacaabay.
Kithure Kindiki, oo ah madaxa wasaaradda arrimaha gudaha iyo maamulka qaranka, ayaa sidoo kale mas’uul ka ah ciidamada booliiska Kenya, oo hadda wajahaya baaritaanno ku aaddan sida ay uga fal celinayaan dibadbaxyada.
Magacaabista, oo ay tahay inuu ansixiyo baarlamaanka, ayaa sidoo kale waxaa ku jira haweeneydii ugu horreysay ee ah xeer ilaaliyaha guud ee Kenya.
Laakiin dadka u dhaqdhaqaaqa ayaa si deg deg ah u diiday magacaabista Ruto waxayna soo galiyeen sawiro ay ku qoran yihiin “Waa la diiday.
Isbaheysiga mucaaradka Azimio ayaa ku gacan seyray ku dhawaaqista Ruto oo ay ku tilmaameen isbedel “qurxin” waxayna sheegeen in aysan ku biiri doonin dowlad midnimo qaran oo uu hogaamiyo Ruto.
