Sahan Media Muqdisho: Siddeed badmaax oo u dhashay waddanka Masar ayaa lasii daayay, kuwaas oo tan iyo 2-dii May lagu haystay markabka M/T Eureka oo laga qafaashay xeebaha Puntland, sida ay sheegtay Wasaaradda Arrimaha Dibadda Masar.
Wasiirka Arrimaha Dibadda Masar Badr Abdelatty ayaa safaaradda Masar ee Muqdisho faray inay qaabbisho badmaaxiinta, hubiso xaaladdooda caafimaad iyo badqabkooda, isla markaana fududeyso sidii ay ugu laaban lahaayeen Masar duulimaadka ugu horreeya ee la heli karo.
Wasaaradda ayaa sheegtay in waaxdeeda qunsuliyaddu ay horay ula kulantay qoysaska badmaaxiinta, si ay ugu soo gudbiso xogta ku saabsan dadaallada lagu doonayay in lagu sii daayo.
Intii ay afduubka ku jireen, safaaradda Masar ee Muqdisho ayaa sidoo kale fududeysay xiriirka u dhexeeyay badmaaxiinta iyo qoysaskooda, si qoysasku ay ula socdaan xaaladdooda.
Masar ayaa sheegtay in sii deyntooda ay timid kaddib tilmaamo uu bixiyay Madaxweyne Abdel Fattah el-Sisi iyo dabagal joogto ah oo uu wasiirka arrimaha dibadda ku sameeyay kiiska, oo ay ku jireen xiriirro heer sare ah oo uu la sameeyay mas’uuliyiin Soomaaliyeed iyo kuwo Yemen ah.
