Sahan media Muqdisho: Afhayeenka Wasaaradda Arrimaha Dibadda Masar Tamim Khallaf, ayaa daboolka ka qaaday sababaha ay Masar u taageereyso Soomaaliya.
Intii lagu guda jiray wareysi dhanka taleefoonka ah oo uu siiyay barnaamijka “Yahdoth fi Masr” (Happening in Egypt), ee MBC Masr, fiidnimadii Talaadada, Khallaf wuxuu sheegay in Soomaaliya ay xulafo la leedahay Masar xiriir taariikhi ah oo aad u wanaagsan.
Waxa uu ku micneeyay in mowqifka Masar uu cad yahay, maadaama ay taageerayaan dadaallada dowladda dhexe iyo dowladda federaalka Soomaaliya ay ugu jiraan la dagaallanka argagixisada, loona gaaro amni iyo xasillooni.
Masar waxay xushmaynaysaa midnimada, wadajirka iyo madax-banaanida dhulka Soomaaliyeed, wuxuuna caddeeyay inay diidan tahay wax kasta oo lagu carqaladeynayo arrimaha gudaha iyo madax-bannaanida Soomaaliya.
Wuxuu xusay in bishii Agoosto ay kala saxiixdeen hab-maamuuska iskaashiga milateri ee labada dal, isagoo tilmaamay codsigii madaxweynaha Soomaaliya uu ka codsaday Madaxweyne Sisi inuu taageero milateri u fidiyo, iyadoo la eegayo qalalaasaha iyo caqabadaha culus ee Soomaaliya ka haysta la dagaallanka argagixisada.
Heshiiskan waa in lagu eegaayaa qaab-dhismeedkiisa laba geesoodka ah, ayuu ku macneeyay, u jeedaduna tahay kaliya in lagu taageero waddan walaala ah oo Carab ah codsadayna kaalmo.
Afhayeenka wasaaradda arrimaha dibadda Masar ayaa sheegay in gobolka Geeska Afrika uu muhiimad weyn u leeyahay amniga qaranka Masar, isagoo intaa ku daray in taageerada Masar ay siiso Soomaaliya aysan u adeegin oo keliya amniga qaranka Masar, balse ay sidoo kale tahay ammaanka Soomaaliya iyo guud ahaan gobolka.
