Sahan media Muqdisho: Sudan ayaa xaqiijisay Isniintii in Colombia ay raaligelin ka bixisay ku lug lahaanshaha qaar ka mid ah muwaadiniinteeda oo calooshood u shaqeystayaal ah oo ka tirsan ciidamada gargaarka degdega ah (RSF).
Raali-gelintan ayaa timid xilli ay wada hadal dhanka taleefoonka ah ku wada hadleen wasiirka arrimaha dibadda Suudaan Cali Yuusuf iyo dhiggiisa Colombia Luis Gilberto Murillo, sida lagu sheegay bayaan ka soo baxay wasaaradda arrimaha dibadda Suudaan.
Murillo waxa uu muujisay sida uu uga xun yahay ka qayb qaadashada muwaadiniinta Colombia ee dagaalka ay kula jiraan RSF, iyadoo cambaareysay ficiladooda, waxayna carrabka ku adkeysay sida Colombia ay uga go’an tahay xallinta xaaladda iyo xaqiijinta soo noqoshada muwaadiniinteeda, ayaa lagu yiri bayaanka.
Yuusuf ayaa isna dhankiisa muujiyay sida uu ula yaabay ugana murugooday ku lug lahaanshaha dadka Colombia ee dagaalka ka dhanka ah shacabka Suudaan.
Waxa uu ku celceliyay in Sudan ay diyaar u tahay in ay iskaashi la sameyso Colombia si looga hortago dhacdooyinkan oo kale mustaqbalka iyo ilaalinta xiriirka saaxiibtinimo ee labada dal.
Yuusuf waxa uu sidoo kale carabka ku adkeeyay in RSF ay Sudan u aqoonsatay jabhad iyo maleeshiyaad argagixiso ah oo mas’uul ka ah dambiyo iyo xadgudubyo badan oo ka dhan ah rayidka Suudaan.
Warbaahintu waxa ay daaha ka qaaday in Kolombiya ay raaligelin ka bixisay Axadii iyada oo adeegsanaysa safiirkeeda Qaahira, Anne Melania de Gaviria, ka qaybgalka muwaadiniinteeda dagaalka ka socda Suudaan.
Gaviria waxay caasimadda Masar kula kulantay safiirka Suudaan u fadhiya Masar, Emad-Eddin Mustafa Adawi, waxayna u gudbisay naxdinta xooggan ee waddankeeda iyo diidmada markii ay ogaatay in muwaadiniinteeda ay ku lug leeyihiin iskahorimaadka socda.
Waxay cambaareysay ficiladooda oo ay ku tilmaantay mas’uuliyad darro, waxayna ku nuuxnuuxsatay in dowladda Colombia aysan taageersaneyn hab-dhaqanka noocaas ah, sidoo kalena aysan wax xiriir ah la lahayn xoogagga dagaalka kula jira.
21-kii Noofambar, xoogag hubeysan oo isbahaystay oo xulafo la ah ciidanka Suudaan ayaa weerar gaadmo ah ku qaaday kolonyo sahay u siday RSF, iyagoo gacanta ku dhigay dhowr askari oo Colombian ah kuwa kalena ku dilay. Waxay kaloo qabteen dukumentiyo aqoonsi ah oo ay lahaayeen calooshood u shaqeystayaasha Colombia.
Ciidamada ayaa bartooda rasmiga ah ee Facebook soo dhigay muuqaal muujinaya dukumentiyada.
Ilaa hadda, RSF ma aysan soo saarin war rasmi ah oo ku saabsan qabashada ama ku lug lahaanshaha dagaalyahannada ajnabiga ah.
