Sahan Media Muqdisho: Dowladda Zambia ayaa gacanta ku dhigtay toddoba tahriibayaal Soomaali ah oo si qarsoodi ah loogu qariyey gaadhi noociisu yahay Toyota Probox, iyagoo lagu hoos qariyey jawaano bariis ah, xilli gaadhigu ku sii jeeday xadka u dhexeeya Zambia iyo Zimbabwe.
Hay’adda Dakhliga Zambia (ZRA) ayaa sheegtay in gaadhiga lagu qabtay hawlgal kormeer oo ka dhacay deegaanka Kapiri Mposhi ee gobolka Badhtamaha, isagoo ku sii jeeday marinka xuduudda ee Chirundu.
Afhayeenka ZRA, Oliver Nzala, ayaa sheegay in toddobada muwaadiniinta Soomaaliyeed iyo darawalkii waday oo u dhashay Saambiya lagu wareejiyey Waaxda Socdaalka si loo aqoonsado loogana qaado tallaabooyinka waafaqsan Sharciga Socdaalka iyo Masaafurinta ee dalkaas.
Mas’uuliyiinta Zambia ayaa aaminsan in raggan loo tahriibinayey Zimbabwe, ka hor inta aan loo gudbin Koonfur Afrika, oo ah dalka ay inta badan hiigsadaan tahriibayaasha ka imanaya Geeska Afrika iyagoo raadinaya fursado nololeed iyo kuwo dhaqaale.
Zambia ayaa sannadihii u dambeeyey noqotay marin muhiim ah oo ay maraan tahriibayaasha ka imanaya Geeska Afrika, iyadoo shabakadaha dadka tahriibiya ay inta badan adeegsadaan gaadiidka ganacsiga si ay uga dhuuntaan ilaalada xuduudaha iyo ciidamada ammaanka.
Hay’adda Dakhliga Zambia ayaa sheegtay inay sii xoojin doonto hawlgallada lagula dagaallamayo tahriibka dadka iyo jebinta shuruucda socdaalka, iyadoo toddobada muwaadiniin Soomaaliyeed ay weli ku jiraan gacanta Waaxda Socdaalka, halkaas oo lagu wado in lagu dhammeystiro baadhitaannada iyo habraacyada sharciga.
