Sahan media Muqdisho: Booliiska Spain ayaa xaqiijiyay in sawirada Google Street View ay qabteen nin la sheegay in uu “mayd” ku raranayay baabuur.
Google ayaa sawirka soo galisay Oktoobar 2024, laakiin wali waa la daawan karaa marka socdaalka dhijitaalka ah lagu marayo agagaarka tuulada Tajueco, Castile, iyo Leon, oo ay ku nool yihiin 50 qof.
Qaab kale oo bilayska caawiyay ayaa muujinaya qof xidhan dhar la mid ah kan booliska oo riixaya wax u muuqda gaar-gacmeed oo “baakad” cad oo weyn ku jiro.
Shir jaraa’id oo uu qabtay Arbacadii, kormeeraha bilayska Oscar Garcia wuxuu sheegay in sawiradu ay bixiyeen cadaymo muhiim ah oo ku saabsan kiis dil ah.
Sida laga soo xigtay booliisku, kiiskan wuxuu soo bilowday November 2023, markaasoo nin Cuban ah oo 33 jir ah la waayay ina adeerkiis.
Booliisku waxay bilaabeen inay raadiyaan tilmaamo badan waxayna ugu dambeyntii xireen nin iyo naag.
Haweeneyda ayaa lagu soo waramayaa inay tahay lamaane hore oo ninka maqan.
Maxbuuska kale oo ay booliisku ka shakiyeen inuu yahay isla ninka lagu arkay sawirka Google, ayaa lagu soo waramayaa inuu yahay lammaaneheeda cusub.
Kadib markii la xiray lamaanahan, booliiska ayaa sheegay in ay sameeyeen howlgalo ayna soo aruuriyeen cadeymo dheeraad ah oo u horseeday goobta uu yaallo meydka.
11-kii Diseembar, booliisku waxay ka heleen haraaga bini’aadam oo la jarjaray oo ku jira qabuuraha magaalo u dhow meesha dilku ka dhacay. Meydka ayaa ahaa mid aad u burbursan, waxaana la waayay qeybo ka mid ah jirkiisa.
Booliiska ayaa sheegay in baaritaanku uu socdo iyadoo ay ka shaqeynayaan sidii ay dhab ahaan u ogaan lahaayeen waxa dhacay iyo in la helo inta kale ee jirka dhibbanaha.
