Sahan Media Muqdisho: Ilaalada qaranka ayaa garoonka diyaaradaha ee Xeydar Aliyev International Airport ku maamuusay marti sharaftii uu hogaaminayay madaxweyne Xasan, iyadoo calamada labada dal ay isku garab babanayeen.
Booqashadiisii ka dib waxaa garoonka diyaaradaha Madaxweynaha Soomaaliya ku sii sagootiyay Ra’iisul Wasaare ku xigeenka koowaad ee Asarbayjaan Yagub Eyyubov, Wasiir ku xigeenka Arrimaha Dibadda Elnur Mammadov iyo mas’uuliyiin kale.
Hadaan dib ugu noqonno booqashadii rasmiga ahayd ee madaxweynaha Soomaaliya, Xasan Sheekh Maxamuud uu ku tagay Asarbayjaan wuxuu madaxdii uu arkay la yeeshar shirar wax ku ool ah iyo wadahadallo muhiim ah oo labada dhinac ah. Maxamuud waxaa si diiran u soo dhaweeyay Madaxweynaha Asarbayjaan Ilham Aliyev 12-kii Febraayo, labada hoggaamiye waxay si wadajir ah u qabteen shirar jaraa’id, waxayna kala saxiixdeen heshiisyo dhowr ah oo muhiim ah.
Madaxweyne Maxamuud ayaa kormeeray xarunta shidaalka ee Sangachal, oo ah goob halbowle u ah warshadaha saliidda iyo gaaska ee Asarbayjan. Muhiimadda istaraatiijiyadeed ee terminaalka ayaa labadaba dalba muujiyeen muhiimadda kaas oo sidoo kale si faahfaahsan loogu sharraxay taariikhda saliidda hodanka ah ee Azerbaijan.
13-kii Febraayo, Madaxweyne Maxamuud ayaa booqday cutubyo ka tirsan ciidamada kumaandooska ee Asarbayjaan. Halkaa waxaa uga soo biiray Wasiirka Difaaca Asarbayjaan Colonel General Zakir Hasanov iyo Wasiirka Warshadaha Difaaca Vugar Mustafayev. Waftiga ayaa indhahooda ku soo arkay horumaradii ugu dambeeyay ee dhanka tignoolajiyada difaaca oo ay ka mid tahay qalab casri ah oo ay soo saartay wasaaradda gaashaandhigga.
Booqashadan oo lagu kala saxiixday heshiisyo muhiim ah ayaa sii xoojisay xiriirka ka dhexeeya Soomaaliya iyo Asarbayjaan, taasoo ka tarjumaysa iskaashiga sii kordhaya ee dhinacyada difaaca iyo tamarta.
