Sahan Media Muqdisho: Hay’adda UK Maritime Trade Operations (UKMTO) ayaa sheegtay in Sabtidii markab lagu dhuftay gantaal qiyaastii meel 18 mayl-badeed dhanka bari ka xiga magaalada Khasab ee dalka Cumaan, taasoo sababtay dab ka kacay markabka laakin markii dambe la damiyay.
Qoraal digniin ah, UKMTO waxay ku sheegtay inay warbixin ku saabsan dhacdadan ka heshay il lagu kalsoonaan karo.
Hay’addu waxay sheegtay in ku-dhaca gantaalka uu sababay dab ka kacay markabka dhexdiisa, kaas oo markii dambe la damiyay.
UKMTO waxay sheegtay inaan la soo sheegin waxyeello deegaanka soo gaartay, isla markaana markabka iyo shaqaalihiisuba ay badqabaan.
Hay’addu ma aysan shaacin magaca markabka, calanka uu sito, cidda leh, iyo nooca gantaalka la adeegsaday midkoodna.
UKMTO waxay sheegtay in maamullada ay khuseyso ay baarayaan dhacdada, waxayna kula talisay maraakiibta maraya aaggaas inay taxaddar muujiyaan oo ay soo sheegaan wixii dhaqdhaqaaq shaki leh ah.
Horay maalintii Sabtida, Imaaraadka Carabta ayaa ku eedeeyay Iran inay gantaal ku bartilmaameedsatay markab ay leedahay Shirkadda Shidaalka Qaranka ee Abu Dhabi (ADNOC) xilli uu marayay marinka Hormuz. ADNOC waxay sheegtay inaan la soo sheegin wax dhaawacyo ah iyo in xaaladda la xakameeyay, iyadoo dhanka kalena aysan Iran weli si cad uga hadlin eedeyntaas.
