Sahan Media Muqdisho: Xiisadda ku xeeran shaqaale saarnaa markab shidaal oo lagu afduubtay meel u dhow xeebaha Soomaaliya ayaa sii xoogeysanaysa, kaddib markii qoysaskoodu ay sheegeen inay heleen hanjabaado culus oo uga yimid kooxda haysata.
Ehellada la haystayaasha ayaa sheegay in afduubayaashu ay ku hanjabeen inay waxyeello gaarsiin doonaan shaqaalaha markabka haddii aan si degdeg ah loo bixin lacagta madax-furashada ah ee ay dalbanayaan. Markabka ayaa waxaa saaran siddeed muwaadin oo Masri ah iyo afar u dhashay Hindiya.
Qoysaska badmaaxiinta ayaa sheegay in heshiis hore looga gaaray lacagta madax-furashada uu hakad galay sababo la xiriira dib-u-dhac ku yimid habraacyada xawilaadda lacagaha, taas oo keentay in kooxda afduubka geysatay ay kordhiso cadaadiska.
Sida ay sheegeen qoysaska, afduubayaashu waxay sidoo kale ku hanjabeen inay kala fogeyn doonaan qaar ka mid ah shaqaalaha oo ay geeyn doonaan deegaanno buuraley ah si ay u xoojiyaan cadaadiska lagu saarayo milkiilayaasha markabka.
Wasaaradda Arrimaha Dibadda ee Masar ayaa sheegtay inay si dhow ula socoto xaaladda, iyadoo la kaashanaysa safaaradda Masar ee Muqdisho iyo mas’uuliyiinta Soomaaliya, si loo xaqiijiyo sii-deynta shaqaalaha markabka.
Wararka ayaa tilmaamaya in xiisaddu sii korortay markii milkiilaha markabka uu codsaday muddo dheeraad ah oo lagu dhammaystirayo bixinta lacagta, codsigaas oo ay diideen afduubayaashu.
Dhanka kale, khubaro dhinaca maraakiibta ah ayaa sheegay in hanjabaadaha noocan oo kale ah ay inta badan qayb ka yihiin cadaadis lagu dardargelinayo wada-hadallada lacagta madax-furashada, inkastoo ay qireen in xaaladdu weli tahay mid halis ah.
Waxay sidoo kale xuseen in dib-u-soo-noqoshada falalka burcad-badeednimada ee marin-biyoodka muhiimka ah ee gobolka ay la xiriirto xaaladaha amni ee ka jira deegaanka, taas oo sii kordhinaysa walaaca laga qabo badqabka shaqaalaha maraakiibta.
