Sahan Media Muqdisho: Kooxda Xuutiyiinta Yemen ayaa sheegay in duqeymo xiriir ah oo dhanka cirka ah oo Mareykanka uu ka fuliyay gobolka Al Xudeydah ee galbeedka dalkaasi iyo gobolka Sacda ee waqooyiga dalkaasi.
TV-ga Al-Masirah ee ay Xuuthiyiintu maamulaan ayaa sheegay in duqeymo dhanka cirka ah oo Mareykanku uu la beegsaday Jaziirada Kamaran ee Al Xudeydah, waxaana xigay labo duqeyn oo ka dhacay degmada Al-Salif ee gobolkaasi.
Waxa ay sidoo kale sheegtay in afar duqeyn oo ay fuliyeen diyaaradaha Mareykanka ay la beegsadeen degmada Al-Salaam ee Sacda, iyadoo aan faah faahin dheeraad ah laga bixin khasaaraha nafeed iyo midka hantiyeed.
Horaantii Talaadadii, afhayeenka militariga Xuutiyiinta Yahya Saree ayaa hadal uu taleefishinka ka jeediyay ku sheegay in difaaca cirka ee Xuutiyiinta ay soo rideen diyaarad Drone ah oo Mareykanka MQ-9 Reaper ah oo dul mareysay hawada gobolka Hajjah ee gobolka xeebta iyadoo la adeegsanaayo gantaal gudaha ah oo hawada laga sameeyay.
Saree ayaa sidoo kale shaaca ka qaaday in Xuuthiyiinta gantaalahooda, diyaaradaha kuwa aan duuliyaha lahayn iyo ciidamada badda ay fuliyeen laba howlgal oo lagu beegsaday maraakiibta diyaaradaha Mareykanka ee USS Harry S.
Weerarada waxaa fuliyay “gantaalada baalasha leh iyo diyaaradaha aan duuliyaha lahayn,” ayuu yiri.
Maraykanka ayaa ku dhawaad ​​1,000 duqaymo ah ka fuliyay Yemen tan iyo 15-kii March, halkaas oo ay ku dileen 217 qof oo rayid ah iyo dhaawaca 436, oo u badan haween iyo carruur, taas oo lagu saleeyay xogta rasmiga ah ee Xuutiyiinta oo meesha ka saaraysa khasaaraha soo gaaray ciidamadooda.
Madaxweynaha Mareykanka Donald Trump ayaa bishii hore sheegay in uu amar ku bixiyay “tallaabo militari oo adag” oo ka dhan ah kooxda Xuuthiyiinta oo uu markii dambe ku hanjabay in uu “gabi ahaanba baabi’in doono.” ?
Xuuthiyiinta ayaa bartilmaameedsaday maraakiibta mara badda cas iyo Carabta, marinka Bab al-Mandab iyo gacanka cadmeed tan iyo bishii November 2023 iyaga oo is garabsanaya Falastiiniyiinta ku sugan Marinka Gaza, halkaas oo ugu yaraan 51,000 oo qof lagu dilay weerar bahalnimo oo ay gaysatay Israel.
Kooxda ayaa hakisay weeraradii markii xabad joojin looga dhawaaqay Qaza bishii Janaayo ee u dhaxeysay Israa’iil iyo kooxda iska caabinta Falastiin ee Xamaas balse dib ayey u soo celiyeen kadib markii Israa’iil ay dib u soo cusboonaysiisay duqeymaha ay ku heyso deegaankaas bishii hore.
