Sahan Media Muqdisho: Kadib in ka badan laba bilood oo ay afduub ku hayaan kooxo burcad-badeed ah markabka xamuulka ee Sward meel ka baxsan xeebaha Soomaaliya, waxaa isa soo taraya baaqyada ay dirayaan qoysaska 16-ka badmaax ee Suuriyaanka ah, kuwaas oo sheegaya in xaaladda caafimaad iyo nololeed ee ehelkoodu ay si weyn uga sii dareyso.
Qoysaska ayaa sheegay in badmaaxiintu ay la ildaran yihiin gaajo, biyo yari iyo dawo la’aan, iyadoo xiriirkii tooska ahaa uu go’naa tan iyo dhammaadkii bishii May. Muuqaallo dhawaan la baahiyay ayaa muujinaya shaqaalihii markabka oo codsanaya in si degdeg ah loo badbaadiyo, iyagoo sheegay in sahaydii cuntada iyo biyuhu ay gabaabsi tahay.
Hooyada mid ka mid ah badmaaxiinta ayaa sheegtay in aysan xitaa garan karin wiilkeeda markii ay aragtay muuqaalladii ugu dambeeyay, iyadoo sheegtay in gaajada iyo daalku ay si weyn u beddeleen muuqaalkiisa.
Sida xogaha maraakiibta lagu raadraaco ay muujinayaan, markabka Sward ayaa markii ugu dambeysay laga diiwaangeliyay meel u dhow deegaanka Garacad ee Puntland, halkaas oo la rumeysan yahay inuu weli ku xayiran yahay.
Shirkadda Turkiga ee maamusha markabka ayaa sheegtay in wada-hadallada lagu sii deynayo shaqaalaha iyo markabku ay weli socdaan, inkastoo aan weli la gaarin heshiis kama dambeys ah.
Dhacdadan ayaa dib u soo nooleysay walaaca laga qabo dib u soo laabashada burcad-badeedda xeebaha Soomaaliya, xilli maraakiibta ganacsiga ay wajahayaan khataro amni oo isa soo taraya.
