Sahan Media Muqdisho: Hoggaamiyaha cusub ee Iran, Mojtaba Khamenei, ayaa sheegay in aargudashada geerida aabbihii, Cali Khamenei, ay tahay waajib qaran isla markaana ay “hubaal” dhici doonto, isagoo ku adkeystay in kuwii ka dambeeyay dilka lala xisaabtami doono.
Hadalkan ayaa yimid kadib aas qaran oo loo sameeyay Cali Khamenei, xilli xiisadda u dhaxaysa Iran iyo Mareykanka ay mar kale cirka isku shareertay.
Warbaahinta caalamka ayaa sidoo kale baahisay in saraakiil Mareykan iyo Israa’iiliyiin ah ay sheegeen inay jireen xog sirdoon oo tilmaamaysay in masuuliyiin Iiraaniyiin ah ay ka wada hadleen qorshayaal lagu beegsanayo Madaxweynaha Mareykanka, Donald Trump. Si kastaba ha ahaatee, sheegashooyinkan weli si madax-bannaan looma xaqiijin.
Dhankiisa, Madaxweyne Donald Trump ayaa uga jawaabay hanjabaadahaas isagoo sheegay in haddii Iran isku daydo in la dilo ama la weeraro isaga, Mareykanku uu qaadi doono tallaabo militari oo aad u xooggan, isla markaana bartilmaameedyada Iran si buuxda loo burburin doono. Wuxuu sidoo kale sheegay in amarro militari oo arrintaas la xiriira hore loo sii diyaariyay.
