Sahan media Muqdisho: Maamulka Bolivia ayaa xiray jeneraal hore oo Arbacadii sameeyay isku daygii afgambi ee fashilmay ee ka dhanka ahaa madaxweyne Luis Arce, sida ay sheegtay warbaahinta gudaha.
Juan Jose Zuniga, oo horaantii usbuucan laga eryay taliyaha ciidamada Bolivia, “wuxuu isku dayay inuu dumiyo nidaamka dastuuriga ah,” ayuu yiri wasiir ku xigeenka arrimaha gudaha Jhonny Aguilera ka hor intaan la xirin Zuniga, sida uu sheegay wargeyska Ahora el Pueblo.
Muuqaalo lagu baahiyay baraha bulshada ayaa muujinayay Zuniga oo lagu qasbayo gaari booliis ah oo yaallay banaanka hore ee xero ciidan si loogu qaado xafiiska xeer ilaalinta.
Xafiiska dacwad oogaha ayaa sheegay in baaritaan lagu sameeyay isku daygii afgambiga iyo dhacdooyinka ku xeeran. Kacdoonka militari ayaa bilowday gelinkii dambe ee shalay kadib markii la arkay taangi uu siday Zuniga oo xoog ku galayay madaxtooyada magaalada La Paz.
Arce ayaa markaa ka digay “abaabul ciidan oo aan caadi ahayn” iyo khudbad uu isaga iyo wasiiradiisa ka jeedinayay telefishanka qaranka daqiiqado ka dib isku daygii afgambiga ku casuumay muwaadiniinta si ay u abaabulaan oo ay u difaacaan dimuqraadiyadda.
“Maanta dalka ayaa mar kale wajahaya dano gaara si dimuqraadiyadda Bolivia loo burburiyo,” ayuu yiri. “Waxaan u baahanahay dadka Bolivia inay is abaabulaan oo ay ka hortaggaan afgambiga.”
Madaxa dawladda Bolivia ayaa sheegay in waddanku “uu marayo isku day afgambi” oo uu hoggaaminayo Zuniga. Zuniga ayaa xilka laga xayuubiyay Talaadadii kadib markii loo hanjabay Madaxweynihii hore ee Evo Morales.
Arce ayaa ka horyimid hogaamiyihii isku dayga afgambiga milatari ee ka dhacay afaafka hore ee madaxtooyada ka dib markii gaari gaashaaman uu ka soo galay albaabka. “Dhammaan ciidamadan isla markiiba ka saar. Waa amar,” ayuu ku qayliyay Zuniga. Saacado ka hor, Morales waxa uu cambaareeyay afgambiga.
“Inqilaabku wuu sii socdaa. Waqtigan xaadirka ah, ciidamada qalabka sida iyo taangiyada ayaa la geeyay Plaza Murillo, “ayuu yiri, isaga oo ugu baaqay dhaqdhaqaaqa bulshada inay “difaacaan dimuqraadiyadda.”
Ka dib, Morales ayaa sheegay in baaqii abaabulka la hakiyay, isagoo taasi ku sababeeyay ka bixitaanka ciidamadii ku sugnaa fagaaraha Murillo oo ay degenaayeen ayuu sheegay inay dib ugu laabteen xarunta dowladda. Beesha Caalamka ayaa si kulul u cambaareysay la wareegitaanka xarunta dowladda.
