Sahan media Muqdisho: Soomaaliya ayaa ku eedeysay Itoobiya Jimcihii in ay hub aan la fasaxin siisay maamul goboleedyada.
Wasaaradda arrimaha dibadda ayaa sheegtay in shixnadaha hubku ay ku xad-gudbeen madax-bannaanida Soomaaliya ayna “khatar ku tahay amniga gobolka.”
“Tallaabadan waxay ka dhigan tahay xad-gudub weyn oo lagu sameeyay madax-bannaanida Soomaaliya, waxayna saamayn weyn ku leedahay amniga qaranka iyo kan gobolka,” ayaa lagu yiri war-saxaafadeedka.
Waxay intaas ku dartay in caddaymo la duubay ay xaqiijiyeen imaatinka laba baabuur oo hub ka soo qaaday Itoobiya una soo qaaday Puntland ee Soomaaliya, kuwaas oo lagu fuliyay iyada oo aan wax diblomaasiyadeed ama oggolaansho ah lagu samayn, “taas oo muujinaysa xad-gudub cad oo ka dhan ah madax-bannaanida dhuleed ee Soomaaliya.”
“Dhacdadan ugu dambeysay waxay ka tarjumaysaa shixnad hub ah oo aan sharciyeysneyn oo ka yimid Itoobiya, iyadoo la soo sheegayo in hub si la mid ah loogu daabulay deegaannada Galmudug iyo kayd kale oo diyaarad lagu keenay Baydhabo,” ayay wasaaraddu sheegtay.
Somalia waxay dalbatay in si degdeg ah loo joojiyo xadgudubyada.
Shixnadahan la sheegay ayaa ku soo beegmaya iyadoo ay weli taagan tahay xiisadda u dhaxaysa labada dal ee ku saabsan heshiiska dhinaca badda ee Itoobiya ay la gashay Somaliland.
Soomaaliya ayaa diiday heshiiska aan sharciga ahayn ee Itoobiya ay la gashay Somaliland, waxayna ku tilmaantay mid khatar ku ah deris-wanaagga iyo qaranimadeedana meel-ka-dhac ku ah.
Soomaaliya ayaa u yeeratay safiirkeedii u fadhiyay Itoobiya kadib markii lagu dhawaaqay heshiiska.
