Sahan Media Muqdisho: Ciidamada Iran ayaa Axadii ku duqeeyay diyaarado aan duuliye lahayn maraakiib badan oo Maraykan ah si ay uga aargoostaan ciidamada Maraykanka oo rasaas ku furay oo dhexda u galay markab Iran laga leeyahay, sida ay sheegtay warbaahinta gudaha.
Wakaaladda wararka ee Tasnim ayaa sheegtay in kadib markii ciidamada Mareykanka ay fuuleen markabka TOUSKA ee conteenarada qaada oo marayay gacanka Cumaan, diyaaradahan aan duuliyaha laheyn ee Iran ay duqeeyay maraakiibta, iyadoo aan la kala cadeyn in bartilmaameedku uu ahaa mid militari iyo mid ganacsi.
Iran ayaa goor sii horeysay xaqiijisay in ciidamada Mareykanka ay qabteen markabka Iran waxayna ka digtay inay ku aargudan doonaan “dhowr” tallaabadaas ka dib, taasoo ay ugu yeertay mid xadgudub ku ah xabbad-joojin laba toddobaad ah oo Pakistan ay dhexdhexaadisay taasoo inta badan socotay tan iyo markii lagu dhawaaqay 7-dii Abriil.
Wakaaladda wararka ee Fars News Agency, ayaa sidoo kale sheegtay in xarunta dhexe ee Khatam al-Anbiyaa ay sheegtay in ciidamada Maraykanku ay beegsadeen markabka, isla markaana ay curyaamiyeen habkii ay ku socdaalayeen, ayna fuuleen. Xogta la socodka maraakiibta ayaa muujinaysa TOUSKA oo ka ambabaxay Port Klang ee Malaysia 12-kii Abriil.
Afhayeenka ciidamada Iran Ebrahim Zolfaghari ayaa sheegay in ciidamada Mareykanka ay rasaas ku fureen markabka ka hor inta aysan fuulin.
Dhacdadan ayaa waxaa markii ugu horeysay ku dhawaaqay Madaxweynaha Mareykanka Donald Trump Axadii, waxaana markii dambe xaqiijiyay taliska dhexe ee Mareykanka ee CENTCOM, kaasoo sheegay in markabka USS Spruance uu qabtay markab xamuul oo ka babanaayay calanka Iran, kaasoo isku dayay inuu jebiyo go’doominta ciidamada badda Mareykanka ee gacanka Cumaan.
Sida laga soo xigtay CENTCOM, ciidamada badda ayaa markabka ku sii haya gacanta Mareykanka. Waxa ay bayaan ku sheegtay in markabku ku sii jeeday dekedda Bandar Cabaas ee dalka Iran.
