Sahan Media Muqdisho: Gedion Timotheos, Wasiirka Arrimaha Dibadda ee Itoobiya, ayaa Khamiistii 06-February-2025 la kulmay Wasiir ku-xigeenka Arrimaha Dibadda ee Turkiga, Burhanettin Duran, iyagoo ka wada hadlay wada-xaajoodyada farsamo ee soo socda ee ku aaddan dhaqangelinta Baaqii Ankara, sida ay sheegtay Wasaaradda Arrimaha Dibadda Itoobiya.
Wasaaraddu waxay sheegtay in Gedion Timotheos uu soo dhaweeyay wafdi heer sare ah oo uu hoggaaminayo Wasiir ku-xigeenka Wasaaradda Arrimaha Dibadda ee Jamhuuriyadda Turkiga, Burhanettin Duraan, halkaas oo ay labada dhinac isku dhaafsadeen aragtiyo farsamo oo ku aaddan dhaqangelinta baaqa.
Wasaaradda Arrimaha Dibadda ayaa intaa ku dartay in Gedion “uu muujiyay sida ay Itoobiya uga go’an tahay in si buuxda loo dhaqan geliyo” heshiiska, wuxuuna Turkiga uga mahadceliyay doorka ay ka qaadatay fududeynta heshiiska saddex geesoodka ah ee Soomaaliya.
Bayaanka Ankara, oo ay ku kala saxiixdeen magaalada Ankara Madaxweynaha Turkiga Recep Tayyip Erdoğan, Ra’iisul Wasaaraha Itoobiya Abiy Axmed, iyo Madaxweynaha Soomaaliya Xasan Sheekh Maxamuud, ayaa dib u xaqiijiyay “ixtiraamka iyo ka go’naanta midba midka kale, midnimadiisa, madax-bannaanidiisa, iyo wadajirka dhuleed,” sida lagu sheegay war-murtiyeedka wadajirka ah.
Heshiisku wuxuu aqoonsaday “faa’iidooyinka kala duwan ee suurtagalka ah” ee Itoobiya inay hesho gelitaanka iyo ka imaanshaha badda” iyadoo xoogga la saarayo ixtiraamka “midnimada dhuleed ee Jamhuuriyadda Federaalka Soomaaliya.” Sidoo kale waxaa lagu sheegay in madaxdu ay isku afgarteen “in la iska dhaafo khilaafka iyo arrimaha la isku hayo.”
Bayaanka ayaa qeexaya qorshaha wada xaajoodyo farsamo oo ku saabsan gelitaanka badda Itoobiya, kaasoo lagu wado inuu bilaabmo bisha Febraayo 2025 laguna soo gebagebeeyo afar bilood gudahood. Labada dal waxay ku heshiiyeen “in ay si dhow uga wada shaqeeyaan sidii loo dhammayn lahaa habaynta ganacsi ee faa’iidada u leh” ee hoos yimaada awoodda madax-bannaanida ee Soomaaliya.
Madaxweynaha Soomaaliya Xasan Sheekh Maxamuud ayaa 11-kii Jannaayo 2025-kii u safray dalka Itoobiya, isagoo kula soo heshiiyay Ra’iisul Wasaare Abiy Axmed in dib loo soo celiyo xiriirkii diblomaasiyadeed ee buuxa, isla markaana la wanaajiyo iskaashiga dhinaca ammaanka ee gobolka. Booqashadan ayaa soo gabagabeysay muddo sanad ah oo diblumaasiyadeed oo u dhaxeeyay labada dal.
