Sahan Media Muqdisho: Xoghayaha Guud ee Jaamacadda Carabta, Naabiil Fahmi, ayaa cambaareeyay tallaabada safiirka Israa’iil uu waraaqihiisa aqoonsiga ugu gudbiyay Somaliland, iyo dhagax-dhigga dhismaha safaarad Israa’iil ay ka furanayso magaalada Hargeysa, isagoo ku tilmaamay xadgudub cad oo ka dhan ah madax-bannaanida Soomaaliya iyo midnimada dhulkeeda.
Bayaan ay Jaamacadda Carabtu soo saartay Isniintii ayaa lagu sheegay in tallaabooyinkani ay qayb ka yihiin dadaallo ay jaamacaddu hore u diidday, kuwaas oo lagu doonayo in xiriir lala sameeyo Somaliland, si Soomaaliya loo kala qaybiyo, loogana faa’iidaysto khilaafaadka gudaha ee dalka si loo ballaariyo saameynta milatari iyo siyaasadeed ee Israa’iil ee ka soo horjeedda Gacanka Cadmeed.
Jaamacadda Carabta ayaa sheegtay in tallaabooyinkaas ay yihiin kuwo aan sharciyad lahayn, isla markaana aysan waxba ka beddelayn xaqiiqda ah in Somaliland ay qayb ka tahay Jamhuuriyadda Federaalka Soomaaliya.
Waxay sidoo kale mar kale xaqiijisay diidmadeeda ku aaddan xiriir kasta oo rasmi ah ama mid aan rasmi ahayn oo lala yeesho maamulka Somaliland, iyadoo laga tallaabayo madax-bannaanida qaranka Soomaaliya.
Jaamacaddu waxay xusuusisay mowqifkii Golaha Jaamacadda Carabta ee ka dhanka ahaa tallaabooyinka Israa’iil ee lagu doonayo kala qaybinta Soomaaliya, kaas oo lagu muujiyay shir aan caadi ahayn oo dhacay 28-kii Diseembar 2025, iyo shirkii caadiga ahaa ee Sebtembar 2026.
Waxay sidoo kale muujisay garab-istaag buuxa oo ay la garab taagan tahay Soomaaliya iyo hay’adaha sharciyadda ku dhisan ee dalka, iyadoo ka digtay saameynta ay tallaabooyinkani ku yeelan karaan amniga iyo xasilloonida Geeska Afrika, Badda Cas iyo Gacanka Cadmeed.
