Sahan Media Muqdisho: Madaxa sirdoonka milatariga ee Ciidanka Qaranka Liibiya (LNA), oo gacanta ku haya bariga iyo qaybo ka mid ah koonfurta Liibiya, ayaa lagu dilay qarax gaari lagu xiray, sida ay ciidanku ku sheegeen.
Fawzi al-Mansouri ayaa la dilay Isniintii markii walxaha qarxa oo gaarigiisa lagu dhejiyay ay qarxeen xilli uu habeenkii ka soo baxayay masaajid ku yaalla deegaanka, sida bayaanka lagu sheegay.
Warbixinnada ayaa sheegaya in dilku uu ka dhacay magaalada Benghazi ee bariga Liibiya.
Hadda waxaa awoodda ku loolamaya laba dowladood: maamulka ay Qaramada Midoobay aqoonsan tahay ee fadhigiisu yahay Tripoli, kaas oo uu hoggaamiyo Ra’iisul Wasaare Abdulhamid Dbeibah, iyo maamul kale oo ka soo horjeeda oo fadhigiisu yahay Benghazi, kaas oo ay taageerayaan taliyaha milatariga iyo madaxa LNA, Khalifa Haftar.
“Weerar heerkiisu sarreeyo oo ka dhacay goob ay si adag u maamusho LNA ayaa sidoo kale ah dharbaaxo weyn oo ku timid sumcadda amniga ee kooxda,” ayuu AFP u sheegay Hamish Kinnear, oo ah falanqeeye ka tirsan shirkadda Verisk Maplecroft ee fadhigeedu yahay UK.
“Xirfadda iyo xogta loo baahday in si guul leh loo beegsado shakhsi heerkiisu sarreeyo ayaa muujinaysa awood ballaaran oo ay leedahay dhinaca falkan ka dambeeyay,” ayuu raaciyay Kinnear.
War-saxaafadeed ay soo saartay, LNA waxay ku sheegtay inaysan “joojin doonin la-dagaallanka argagixisada, isla markaana ay sii wadi doonto halganka loogu jiro xasilloonida iyo amniga Liibiya, iyo weliba mideynta hay’adaheeda.”
Dilka Al-Mansouri ayaa ku soo beegmay xilli ay socdeen dadaallo lagu mideynayo awoodaha fulinta ee dalka, iyadoo la raacayo qorshe ay Washington dhexdhexaadinayso oo ay LNA si cad u taageertay.
Khabiirka arrimaha Liibiya, Jalel Harchaoui, ayaa sheegay in dilku uu “carqaladeyn doono, ama ugu yaraan dib u dhigi doono” heshiiska uu Mareykanku dhexdhexaadinayay.
Dowladda fadhigeedu yahay Tripoli ayaa soo saartay bayaan ay ku cambaareyneyso “weerar argagixiso” oo lala beegsaday al-Mansouri, iyadoo sheegtay inay cambaareyneyso dilkaas “iyadoo aan loo eegin mowqifyada ama xulafada dhinacyada”.
Maamulka Benghazi ayaa maalintii Talaadada galabnimadii qabtay aaska al-Mansouri, waxayna soo bandhigeen sawirro muujinaya rag hubeysan oo xiran dareeska ciidanka, iyadoo xafladda ay ka soo qeyb galeen saraakiil sarsare oo ka tirsan LNA, oo ay ku jiraan Khaled iyo Saddam Haftar.
Wuxuu sidoo kale ahaa shaqsi hormuud ka ahaa howlgalkii uu Haftar, oo ay taageeraysay Ruushka, ku doonayay inuu kula wareego Tripoli sannadkii 2019-kii, kaas oo ay fashiliyeen ciidamada caasimadda oo helayay taageerada Turkiga.
