Sahan Media Muqdisho: Adeegga Internet-ka ee Satellite-ka ee Starlink ee SpaceX ayaa hadda loo ogolaaday Soomaaliya, sida uu ku dhawaaqay mulkiilaha Elon Musk.
Tani waxay Soomaaliya ka dhigeysaa waddankii ugu dambeeyay ee Afrikaan ah ee oggolaaday hawlgallada Starlink, ka dib markii dhowaan laga ansixiyay Niger bishii hore iyo Liberia bishii Janaayo.
Sida lagu sheegay war qoraal ah oo lagu daabacay website-ka hay’adda sharci-dejinta, munaasabad lagu soo bandhigayay mashruucan ayaa lagu qabtay caasimadda Muqdisho, waxaana ka soo qeyb galay mas’uuliyiin ka tirsan dowladda iyo wakiillada Starlink.
“Muddo laba sano iyo bar ah ayaanu wada-hadallo kula jirnay shirkaddan (Starlink), waxaanan siinay ruqsadda maanta,” ayuu yiri Mustafa Yaasiin, oo ah agaasimaha isgaarsiinta ee wasaaradda isgaarsiinta Somalia.
“Waxaan rajeyneynaa in Starlink ay kordhiso tayada internetka ee ka jira Soomaaliya, waxayna ka dhigi doontaa adeegga internetka inuu gaaro meelo fog fog,” ayuu raaciyay.
Soomaaliya waxay horey u heshay dhowr xirmo oo internet badda hoosteeda ah, laakiin hirgelinta adeegga dayax-gacmeedka ee Starlink ayaa la filayaa inuu ballaariyo isku xirka gobollada fogfog ee dalka iyo kuwa aan internetka lahayn.
