Sahan media Muqdisho: Dowladda Itoobiya ayaa sheegtay inay wajahayso dhaqaale xumo, iyadoo uu hoos u dhacay dakhligii gudaha, sababo la xiriraha colaadaha ka taagan dalka iyo xaaladaha bini aadanimo, oo ay abaarta ugu horeyso.
Wasiirka Maaliyadda Axmed Shide ayaa Golaha Wakiilada u soo gudbiyay warbixin ku saabsan kharashaadka ka baxa dowladda ee adeegga bulshadda iyo dakhliga soo gala.
Wuxuu dakhliga dawladdu uu ahaa 331.1 bilyan oo birr [$5.76 billion), kharashkuna uu ahaa 470 bilyan oo birr [8.17 billion] siddeedii bilood ee la soo dhaafay, walaaca laga qabo in la bixin waayo deynta dibadda ayaa kor u kacay.
Desalegn Wedage, oo ah guddoomiyaha guddiga joogtada ah ee gorsheynta, miisaaniyadda, iyo maaliyadda, ayaa carrabka ku adkeeyay muhiimadda in la bixiyo deynta sii kordheysa, wuxuuna ku booriyay Xukuumadda in la beddelo jihada siyaasadda.
Wasiiru dowlaha maaliyadda Eyob Tekalgn ayaa soo jeediyay in la xoojiyo dakhliga gobollada si meesha looga saaro faqriga. Caqabadaha ka jira mashaariida federaalka oo ay ugu wacan tahay colaadda ayaa sidoo kale laga hadlay.
Tan iyo 2020, Itoobiya waxaa ka socday dagaallo, gaar ahaan gobollada Tigray, Amhara iyo Oromia, halkaasoo ay ka jiraan fallaago dowladda kasoo horjeeda.
