Sahan Media Muqdisho: Wasiirka Maaliyadda ee Ruushka, Anton Siluanov, ayaa si lama filaan ah uga soo muuqday shirka maaliyadda ee kooxda G20 oo ay martigelisay dalka Mareykanka, kaas oo ka dhacayay gobolka North Carolina; tallaabadan ayaa dhalisay caro iyo niyad-jab dhanka wasiirrada iyo saraakiisha reer Yurub.
Ka soo qayb-galka Siluanov ee shirkaas ka dhacayay magaalada Asheville maalintii Isniinta ayaa ah markii ugu horreysay ee wasiirkan — oo xilka loo magacaabay sanadkii 2011-kii uu si shaqsi ah uga qayb-galo shirka G20 tan iyo markii Moscow ay billowday duullaankeedii ballaarnaa ee ay ku qaadday Ukraine sanadkii 2022-kii.
Kulanka labada dhinac ayaa la yeeshay Xoghayaha Maaliyadda Mareykanka Scott Bessent, iyadoo Wasaaradda Maaliyadda Ruushka ay sheegtay in labada nin ay ka wada hadleen iskaashiga dhaqaale ee ku jira qaab-dhismeedka G20.
Sarkaal Mareykan ah ayaa sheegay in kulanka diiradda lagu saaray qorshaha nabadda ee Madaxweynaha Mareykanka Donald Trump ee Ukraine.
Markii la weydiiyay martiqaadka Siluanov, Trump ayaa u sheegay wariyeyaasha: “Waxaan jecelnahay inaan la jaanqaadno qof walba. Mid ka mid ah sababaha aan ugu guuleysto, waan la jaanqaadayaa qof walba.”
Si kastaba ha ahaatee, mas’uuliyiinta Yurub ayaa dhaleeceeyay tallaabada.
Wasiirka Maaliyadda Poland Andrzej Domanski ayaa sheegay inuu ku faraxsanayn inuu arko Moscow oo matasha, inkastoo uu aqoonsaday xuquuqda martigeliyeyaasha G20 ay u leeyihiin inay martiqaadaan martida.
“Ma aaminsani Ruushka. Si joogto ah ayay u been sheegaan, waxaadna u baahan tahay inaad runtii, aad uga taxaddarto inta aad kala hadlayso,” ayuu u sheegay wakaaladda wararka ee Reuters, isagoo ku nuuxnuuxsaday in Ruushku uu ahaa gardarrada colaadda Ukraine.
“Markaa aniga ahaan, way igu adkaan doontaa inaan la yeesho nooc kasta oo wadahadal ah Ruushka.”
