Sahan media Muqdisho: Ra’iisul Wasaaraha Soomaaliya, Xamza Cabdi Barre, ayaa maanta oo Sabti ah booqasho rasmi ah uga bilaabatay magaalada Baqdaad, iyadoo uu soo dhaweeyay Ra’iisal Wasaaraha Ciraaq Maxamed Shiico Al-Sudani.
War qoraal ah oo ka soo baxay xafiiska Al-Sudani ayaa lagu xaqiijiyay soo dhaweynta Barre markii uu gaaray caasimadda Ciraaq.
Sida laga soo xigtay xafiiska ra’iisul wasaaraha Soomaaliya, Barre ayaa lagu wadaa inuu la kulmo madaxda dalka Ciraaq oo uu kala hadli doono sare u qaadida xiriirka labada dal. Ajandaha waxaa ka mid ah in laga wada hadlo iskaashiga amniga iyo dhaqaalaha iyo dadaallada lagu hormarinayo iskaashiga dhinacyada kala duwan.
Booqashada Barre ayaa ka dambeysay martiqaad rasmi ah oo uu ka helay dowladda Ciraaq.
