Sahan Media Muqdisho: Ugu yaraan 15 qof ayaa dhintay, halka 27 kalena ay weli la’an yihiin ka dib markii doon xamuul badan qaadday ay ku rogmatay harada Kariba ee dalka Zimbabwe, sida ay sheegtay Hay’adda Ilaalinta Dadweynaha ee dalkaas.
Hay’addu waxay bayaan ku sheegtay in doontu ay rogmatay ka dib markii ay ku dhaceen mowjado xooggan, waxayna intaas ku dartay in la badbaadiyay ugu yaraan 77 qof.
Doonta ayaa u kala gooshta magaalada waqooyiga Kariba iyo dhowr jasiiradood iyo xeryo kalluumeysi, waxayna siday in ka badan 90 qof markii ay degtay, sida ay sheegtay hay’addu.
In kasta oo tirada saxda ah ee rakaabka iyo shaqaalaha aan weli la shaacin, hay’addu waxay sheegtay inay ku xaqiijin karto oo keliya iibinta tigidhada diiwaangashan inay saarnaayeen 114 rakaab oo qaangaar ah, iyo shan shaqaale ah.
Waxaa jiri kara tiro aan la garanayn oo carruur ah oo ka yar da’da tikidhada oo saarnaa oo aan la ogeyn, ciidamada booliiska qaranka ee Zimbabwe ayaa sheegay in dadaallada samatabbixinta ay socdaan.
Marqaati Maxton Kanhema ayaa u sheegay wakaaladda wararka ee AFP in markabku uu ku baxay cimilo xun, iyo in mowjad ay ku dhacday doontii, taasoo keentay in matoorradeeda ay damiyaan.
