Sahan media Muqdisho: Xuutiyiinta Yemen ayaa burburiyay markab shidaal waxayna soo rideen diyaarad kale oo MQ-9 Reaper ah oo uu leeyahay Mareykanka, xilli ay ballanqaadeen weeraro kale oo ka dhan ah dagaalka Israa’iil ee Gaza.
Afhayeen u hadlay kooxda xuutiyiinta ah Yahya Saree, ayaa ku sheegay ciwaankiisii ugu dambeeyay ee telefishinka laga sii daayay subaxnimadii Sabtida in “Markabka saliida ee Britain Andromeda Star” lagu bartilmaameedsaday Badda Cas isaga oo lala beegsaday gantaalo badda ah oo si toos ah loo garaacay.
Milateriga Maraykanka ayaa xaqiijiyey in kooxdu ay saddex gantaal oo ah nooca ballistic-ga ah ay ku garaacday badda cas, iyadoo la beegsaday bartilmaameedyo badan, ayna waxyeello u geysatay MV Andromeda Star. Wakaalada wararka ee Reuters ayaa sheegtay in markabkan dhawaan laga iibiyay shirkad ka diiwaan gashan Jaziirada Seychelles.
“MV Andromeda Star waxa uu soo sheegayaa khasaare yar, balse waxa uu sii wadayaa safarkiisa,” Taliska dhexe ee Maraykanka (CENTCOM) ayaa ku yiri qoraal uu soo dhigay X, isaga oo intaa ku daray in aanay jirin wax dhaawac ah ama khasaare ah oo ay soo sheegeen isbahaysiga millatariga badda ee Maraykanku hoggaamiyo ee la geeyay goobta si looga hortago weerarada Yemen.
Afhayeen u hadlay militariga Xuuthiyiinta ayaa sidoo kale sheegay in ciidamadooda difaaca cirka ee Yemen ay sidoo kale soo rideen diyaarad nooca MQ-9 Reaper oo ah nooca aan duuliyaha lahayn ee ciidamada Maraykanka oo gantaal ku dhex riday hawada gobolka Sacda “xilli ay fulinayeen hawlgalo cadawtinimo ah”.
Milateriga Mareykanka ayaan ka hadlin diyaaraddan, balse warbaahinta Mareykanka ee CBS News ayaa xaqiijisay in diyaaradda MQ-9, oo qiimaheedu dhan yahay 30 milyan oo dollar uu “ku burburay” gudaha Yemen horraantii Jimcihii, wuxuuna sheegay in baaritaan uu socdo.
Waa weerarkii 3-aad ee diyaaradaha aan duuliyaha lahayn ee Mareykanka ay Xuuthiyiintu soo ridaan tan iyo markii uu bilowday dagaalka Gaza, iyadoo tii ugu horreysay la soo riday bishii November, waxaana ku xigtay mid kale bishii February.
Kooxda Yemen ayaan wax hadal ah ka soo saarin weeraro dheeraad ah oo lagu qaaday maraakiibta mara marin biyoodka u dhow, balse militariga Mareykanka ayaa sheegay in gantaalada lidka maraakiibta ee Xuutiyiintu ay sidoo kale beegsadeen MV MAISHA, oo ah markab ka babanaya calanka Antigua/Barbados, balse uu leeyahay Liberia. Ma aysan sheegin khasaare.
