Sahan media Muqdisho: Wasiirka arrimaha dibadda ee Ruushka Sergei Lavrov ayaa ku booriyay Israa’iil sabtidii in ay iska dayso “hababka argagixisanimo ee aasaasiga ah ee lagu xallinayo dhibcaha siyaasadeed” isagoo ka hadlaayay dilkii hoggaamiyihii Hezbollah Hassan Nasrallah.
Lavrov ayaa shir jaraa’id oo uu ku qabtay magaalada New York ku sheegay in uu qabo aragtida ah in Israa’iil ay isku dayayso in ay ka caraysiiso Iran iyo kooxda iska caabinta ee Lubnaan ee Xisbullah, si ay ugu riixdo Maraykanka in uu si toos ah ugu lug yeesho colaadda Bariga Dhexe.
Diblumaasiga Ruushka u dhashay ayaa xusay in dilka Nasrallah uusan ahayn tillaabadii ugu horeysay ee daandaansi ah oo ay qaado Israel. Hogaamiyihii Xamaas Ismail Haniyeh ayaa bishii July lagu dilay caasimada Iran ee Tehran halkaas oo uu u tagay ka qayb galka aaska madaxweyne Ebrahim Raisi. Intaa ka hor, Israa’iil waxay weerartay safaaradda Iran ee ku taal caasimadda Dimishiq ee Suuriya.
“Sida muuqata, Israa’iil waxay doonaysaa inay abuurto sabab uu Maraykanku uga qayb-galo dagaalkan, si ay sababtaas u abuurtona waxay kicinaysay Iran iyo Xisbullah labadaba. Xaaladdan oo kale, hoggaanka Iran wuxuu u dhaqmayaa si mas’uuliyad weyn leh,” ayuu yiri. . “Uma maleynayo in tani ay tahay wadada saxda ah, waxaan ku qanacsanahay in dhiiga daadanaya ay tahay in la joojiyo.”
Mar Lavrov wax laga weydiiyey rabitaanka Israa’iil ee ah in ay dhaqangeliso go’aannada Golaha Ammaanka ee Qaramada Midoobay, waxa uu yiri: “Ma arko rabitaanka Israa’iil ee ah in ay fuliso wax qorshe nabadeed ah. Lavrov ayaa markaa ballan qaaday in uu sii wadi doono dadaallada looga hortagayo in colaadda Mideast ay ku faafto waddamo kale.
Waxa uu barbardhigay ficillada Israa’iil iyo Yukreeniyaan, isaga oo ku doodaya, in madaxweyne Volodymyr Zelensky uu sidoo kale samaynayey wax kasta oo uu ku kicinayo faragelinta tooska ah ee NATO ee dagaalka Ruushka. Isagoo ka hadlaya shirkii ugu horreeyay ee hindisaha “Saxiibada Nabadda” ee lagu xallinayo dagaalka Ruushka iyo Ukraine, oo ay dhiirrigelinayaan Shiinaha iyo Brazil, Lavrov wuxuu sheegay in Moscow ay la socon doonto horumarka sababtoo ah xilligan la joogo nuxurka hindisuhu waa “wax kasta oo wanaagsan iyo wax walba xun.”
Diblomaasiga, ayaa su’aal galiyay joogitaanka Faransiiska iyo Switzerland ee kulanka, isagoo carabka ku adkeeyay in dowladahaasi aysan dhex dhexaad ka aheyn, sidaasi darteedna aysan waxba ka geysan karin raadinta xal isku dheelitiran. Lavrov waxa uu carabka ku adkeeyay in Ruushku uu had iyo jeer taageero hindisayaasha nabadda,
Isagoo u soo jeestay hadaladii ka soo yeeray dowladda Georgia, ayuu ku eedeeyay madaxweynihii hore Mikheil Saakashvili inuu daaha ka qaaday dagaal uu la galay South Ossetia iyo Abkhazia, Lavrov wuxuu yiri, “Hoggaanka Georgia ee hadda jira waxay si daacad ah u qiimeeyaan wixii la soo dhaafay,” isagoo raaciyay in Ruushku uu diyaar u yahay inuu gacan ka geysto dib u heshiisiinta Tbilisi iyo deriskeda.
Dhanka soo jeedinta madaxweynaha Ruushka Vladimir Putin ee ah in dib loo eego caqiidada nukliyeerka ee qaranka, Lavrov wuxuu sheegay in Moscow ay aaminsan tahay in hadaladiisa “la maqlay.”
Dhanka kale, Ruushka ayaan wax qorshe ah u hayn inuu kordhiyo hubkiisa Nukliyeerka, ayuu yidhi.
