Sahan media Muqdisho: Saraakiisha Ciidanka Booliska Soomaaliyeed ee Dowlad Goboleedka Hirshabeelle ayaa soo gaba gabeeyay tababar socday muddo shan maalmood ah oo ku saabsanaa baaritaanka faraha iyo cadeymaha aruurintooda.
Tababarkan oo ay soo qaban qaabiyeen ciidamada booliska Midowga Afrika ee ku meel gaarka ah ee Soomaaliya (ATMIS) ayaa lagu qabtay xarunta garoonka diyaaradaha ee magaalada Jowhar, waxaana ujeedadiisu ahayd in saraakiisha la siiyo xirfado iyo aqoon ay ku baari karaan, isla markaana ay gacanta ku hayaan kiisaska dambiyada culus.
Kooxda dambi baarayaasha ayaa lagu soo qaatay mawduucyo kala duwan oo ay ka mid yihiin ururinta faraha ee goobaha dembiyada, falanqaynta, is waafajinta faraha iyo kaydka xogta oo muhiim u ah aqoonsiga iyo soo qabashada dembiilayaasha.
“Tababarkan waa mid muhiim u ah saraakiisheena sababtoo ah waxa ay ka caawineysaa in ay si fudud u baaraan dambiyada ay galeen ama ay ku guda jiraan soo qabashada tuhmanayaasha. Sidaa darteed waxaan ku boorinayaa ka qaybgalayaasha inay aad u fiirsadaan, oo ay diiradda saaraan ugu dambayna ay adeegsadaan xirfadihii ay barteen si ay waajibaadkooda u gutaan,” ayuu yiri Gaashaanle Axmed Cabdulle Madoobe, taliye ku-xigeenka saldhigga booliiska garoonka Jowhar.
Lt. Madoobe ayaa uga mahadceliyey ATMIS qabanqaabada tababarka, isagoo xusay in “ay u sahli doonto Ciidanka Booliska Soomaaliyeed inay si hufan oo xirfad leh u baaraan dambiyada”.
Taliyaha Booliska ATMIS ee Jowhar, ASP Earnest Agbo, ayaa hoosta ka xarriiqay doorka tababarka ee kor u qaadista xirfadaha baarista ee saraakiisha si ay u maareeyaan kiisaska dembiyada adag ee loo adeegsado hababka cilmiga casriga ah.
“Aqoonta gaarka ah ee la helay waxay wax badan ka tari doontaa caawinta booliiska si ay u aqoonsadaan tuhmanayaasha iyo xallinta dambiyada adag, si wax ku ool ah u taageeraan raadinta Soomaaliya ee nabadda iyo xasilloonida. Aad ayaan ugu faraxsanahay in aan siinnay saaxiibadeena Soomaaliyeed xirfado muhiim ah oo muhiim u ah baaritaannada iyo mas’uuliyadda sharci fulinta,” ayuu ASP Agbo ka sheegay xafladda xiritaanka tababarka.
C/llaahi Maxamed Cismaan oo ka mid ahaa ka qeyb galayaasha tababarka ayaa uga mahadceliyay ATMIS qaban qaabada tababarka, waxaana uu ku baaqay in la kordhiyo dadaallada kor loogu qaadayo tayada ciidamada Booliska Soomaaliyeed si ay u sameeyaan baaritaanno xirfadeed.
